Rrobaqepësi nga Mitrovica me zanat nga Parisi

Parisi është ndër qytetet më të vjetra të modës në botë për shumë emra të mëdhenj të artit.

Aty karrierën e nisi edhe rrobaqepësi më i famshëm i Mitrovicës, Veton Baruti.

Teknikat e qepjes i mësoi në qytetin e modës, për t’i praktikuar më vonë në qytetin e lindjes.

Tashmë janë bërë rreth 50 vjet në punën e tij me gërshërë, gjilpërë e makinë.

Para kryeqytetit francez, në këtë biznes e tërhoqi vëllai i tij, tashmë i ndjerë.

Thotë se familja Baruti ishte ndër të parat që kishte prodhuar veshje në qytet, derisa profesionin ua kanë bartur edhe gjeneratave të reja.

Nuk bën të jesh rrobaqepës i vjetër e të mos i kesh merak orët e xhepit. I tillë është edhe Veton Baruti.

Ai ka koleksionuar 65 orë xhepi.

Zanatliu ka edhe një pasion tjetër. Atë për kaktus.

Ai është familjarizuar me klientët e tij me të cilët shijon edhe pauzën duke pirë çaj.

Thotë se zanati i tij dikur vlerësohej më shumë.

Me harmoni ai i përcjell klientët duke iu dhënë edhe porosinë: “Nëse jeni të kënaqur tregoni çdo kujt, nëse jo, vetëm neve”.