Kënga klasike festive që ia kaloi asaj të Mariah Careyt

Një këngë klasike festive ka arritur majën globale këtë sezon festash, duke rrëzuar për herë të parë nga vendi i parë këngën ikonike të këngëtares, Mariah Carey, “All I Want for Christmas Is You”.

Billboard ka njoftuar se “Last Christmas” nga grupi muzikor Wham! ka arritur vendin e parë në top listën Global 200. Kjo shënon herën e parë që një këngë tjetër festive, përveç asaj të Careyt, kryeson këtë renditje që nga krijimi i top listës në muajin shtator të vitit 2020, ka raportuar People.

Kënga “Last Christmas” nga grupi muzikor Wham!:

Sipas Billboard, “All I Want for Christmas Is You”, e publikuar në vitin 1994, ka qenë në krye të Global 200 për gjithsej 19 javë që nga dhjetori i vitit 2020, duke mbajtur rekord unik për këngët e Krishtlindjes.

Kënga “All I Want for Christmas Is You” nga Mariah Carey:

Ndërkohë, më herët këtë muaj, “Last Christmas” arriti kulmin më të lartë ndonjëherë në SHBA, duke u renditur në vendin e dytë si në top listën Billboard Hot 100 ashtu edhe në Holiday 100, menjëherë pas këngës së Careyt, e cila vazhdon të mbetet numër një në këto lista amerikane.

Andrew Ridgeley, anëtar i grupit Wham!, u shpreh i emocionuar për këtë arritje.

“Jam shumë i lumtur të mësoj se kënga e përhershme e Krishtlindjes nga Wham!, ‘Last Christmas’, ka siguruar këtë javë vendin e dytë në Billboard”, ka thënë ai.

Këngëtari ka shtuar se që nga publikimi i saj më shumë se 40 vjet më parë, “Last Christmas” është kthyer në një nga këngët më të dashura të Krishtlindjes në mbarë botën, e pëlqyer nga të gjitha brezat.

“Kjo është dëshmi e jashtëzakonshme e vendit të veçantë që kjo këngë zë në zemrat e njerëzve dhe diçka për të cilën kompozitori i saj, George Michael, do të ishte jashtëzakonisht krenar”, ka thënë ai.

Ridgeley, 62 vjeç, e mbylli mesazhin duke falënderuar të gjithë ata që e kanë përqafuar këtë këngë “si një copëz të vogël të Krishtlindjes së tyre”

Edhe përfaqësuesit e trashëgimisë së George Michael kanë reaguan për suksesin.

“Jemi shumë të kënaqur që ‘Last Christmas’, kënga ikonike e Wham!, ka arritur nivelin më të lartë ndonjëherë në vendin e dytë të Billboard Hot 100. Kjo është dëshmi e një kënge brilante dhe një incizimi të përjetshëm që mishëron frymën e Krishtlindjes dhe vazhdon të prekë publikun, duke tërhequr edhe dëgjues të rinj në mbarë botën, më shumë se katër dekada pas publikimit të saj. Faleminderit të gjithëve që e mbajnë këtë këngë në zemër të festës së Krishtlindjes”, thuhet në deklaratën e tyre.

George Michael ka vdekur në ditën e Krishtlindjes në vitin 2016, në moshën 53-vjeçare.

“Last Christmas” u publikua në muajin dhjetor të vitit 1984 dhe prej atëherë është kthyer në një hit të përvitshëm gjatë festave.

Në Shtetet e Bashkuara, kënga është certifikuar nëntë herë me statusin platinum, duke konfirmuar popullaritetin e saj të jashtëzakonshëm.