Celine Dion porosit fansat që të vlerësojnë atë që kanë

Këngëtarja me nam, Celine Dion, u ka bërë thirrje fansave që “të ngadalësojnë” dhe të vlerësojnë atë që kanë, në mesazhin e saj të Ditës së Falënderimeve.

57-vjeçja, e diagnostikuar në vitin 2022 me sindromën neurologjike stiff person, që i shkakton ngurtësim të muskujve, përmes një videoja të publikuar në Instagram, u ka kërkuar njerëzve të ndalojnë për një moment dhe të reflektojnë.

“Të dashur miq, sot është një kujtesë e bukur për të ngadalësuar, për të marrë frymë thellë dhe për të falënderuar. Ka diçka shumë të fuqishme te momentet kur mblidhemi me njerëzit që duam, qoftë rreth tryezës së plotë, në telefon, apo edhe vetëm në zemër”, ka thënë ylli kanadez.

Këngëtarja e hitit “Think Twice” shprehu mirënjohjen e saj për familjen në videomesazh.

“Jam shumë mirënjohëse për familjen time dhe për momentet tona së bashku që janë bota për mua. Qoftë kjo Ditë e Falënderimeve e mbushur me gëzim, paqe dhe falënderim për gjithçka, edhe për gjërat e vogla. Gëzuar Ditën e Falënderimeve, nga unë dhe familja ime, për ju dhe familjet tuaja”, ka thënë këngëtarja.

Dion më parë i kishte falënderuar fansat për mbështetjen e palëkundur teksa u kishte uruar fillim të mbarë të vitit.

“Ndërsa po e mbyllim një vit tjetër së bashku, dua të shpreh mirënjohjen time të sinqertë për mbështetjen tuaj të palëkundur. Dashuria dhe energjia juaj më frymëzojnë çdo ditë. Ju uroj një sezon festash të mbushur me ngrohtësi, të qeshura dhe momente të çmuara me njerëzit e zemrës. Ja për mundësitë e pafundme në vitin që vjen. Ju uroj pushime të sigurta dhe një Vit të Ri fantastik!”, pati shkruar ajo në Instagram për vitin 2025.

Artistja u detyrua të anulonte turneun “Courage World Tour” pas diagnostikimit me sindromën stiff-person. Motra e saj, Claudette, shpjegoi se sëmundja bën që këngëtarja “nganjëherë të mos ketë kontroll mbi muskujt e saj”.

“Ka nga ata që kanë humbur shpresën sepse është një sëmundje jo shumë e njohur. Ajo që më dhemb është se Celine ka qenë gjithmonë e disiplinuar. Ajo gjithmonë ka punuar shumë. Nëna jonë gjithmonë i thoshte: ‘Do ta bësh mirë, do ta bësh si duhet’”, pati thënë ajo për revistën kanadeze 7 Jours.

Dion pati një rikthim të papritur në qendër të vëmendjes në Grammy Awards 2024, ku prezantoi çmimin Albumi i Vitit në fund të ceremonisë.

“Faleminderit të gjithëve. Ju dua po aq sa më doni ju mua. Kur them se jam e lumtur që jam këtu, e them nga zemra. Ata që janë bekuar të jenë pjesë e Grammy Awards duhet të mos e marrin kurrë si të mirëqenë dashurinë dhe gëzimin e jashtëzakonshëm që muzika i sjell jetës sonë dhe njerëzve në mbarë botën”, pati thënë ajo.