Konservuesit e ushqimit, të rrezikshëm për shëndetin e zemrës

Një studim i ri i realizuar në Francë ka zbuluar se disa konservues të zakonshëm që përdoren në ushqimet e gatshme mund të lidhen me rrezik më të lartë për tension të lartë të gjakut, sulm në zemër dhe sulm në tru, ka shkruar CNN.

Sipas hulumtimit, konservuesit që përdoren për të parandaluar bakteret dhe mykun në ushqime të paketuara u lidhën me 29 për qind më shumë rrezik për tension të lartë të gjakut dhe 16 për qind më shumë rrezik për sulm në zemër dhe sulm në tru

Studimi ka treguar se edhe disa konservues të quajtur “natyralë”, si acidi citrik dhe acidi askorbik (vitamina C), mund të lidhen me rrezik më të lartë për tension të lartë te personat që konsumojnë shpesh ushqime që i përmbajnë.

Sipas studiueses Mathilde Touvier, vitamina C që gjendet natyrshëm në fruta nuk është e njëjtë me versionin e përdorur si aditiv ushqimor.

“Acidi askorbik që gjendet natyrshëm dhe ai i shtuar në ushqime, i cili mund të prodhohet kimikisht, mund të kenë efekte të ndryshme në shëndet”, ka thënë ajo.

Touvier ka theksuar se rezultatet e studimit nuk vlejnë për frutat dhe perimet natyrale.

Studimi u publikua në European Heart Journal dhe ka analizuar mbi 112 mijë persona në Francë.

Studiuesit zbuluan se disa konservues si nitriti i natriumit, sorbati i kaliumit e metabisulfiti i kaliumit, ishin më shpesh të lidhur me rritjen e tensionit të gjakut.

Këta përbërës përdoren zakonisht në mishra të përpunuar si proshuta dhe sallamet, verë dhe birrë, djathëra si dhe produkte furre dhe salca.

Ekspertët thonë se ushqimet e shumëpërpunuara prej kohësh lidhen me probleme serioze shëndetësore, përfshirë obezitetin, diabetin e tipit 2 dhe sëmundjet e zemrës.

Megjithatë, studiuesit theksojnë se konservuesit përdoren edhe për të parandaluar prishjen e ushqimit dhe helmimet ushqimore.

Profesori Gunter Kuhnle ka thënë se konservuesit kanë rol të rëndësishëm në sistemin ushqimor sepse ndihmojnë në ruajtjen e ushqimit dhe zvogëlimin e mbetjeve ushqimore.

Sipas ekspertëve, mënyra më e mirë për të ulur ekspozimin ndaj këtyre përbërësve është konsumimi i ushqimeve sa më të freskëta dhe sa më pak të përpunuara.

Ata rekomandojnë fruta dhe perime të freskëta, ushqime të gatuara në shtëpi, produkte të ngrira pa shumë aditivë si dhe reduktimin e mishrave të përpunuar dhe ushqimeve të gatshme.

Ani pse studimi nuk provon drejtpërdrejt se konservuesit shkaktojnë sëmundje, ekspertët thonë se rezultatet janë mjaft serioze për të kërkuar studime të tjera më të thelluara.