Si ndikojnë ushtrimet pilates në trupin tuaj?

Pilates janë ushtrime të njohura për forcimin e trupit, fleksibilitetin dhe balancën.

National Geographic ka shkruar se çfarë thonë ekspertët rreth përfitimeve nga këto ushtrime.

Sipas Kaysha Thomas, mësuese e ushtrimeve pilates, ato janë shpallur si një lloj mënyre për të arritur një trup të hollë dhe të gjatë, por në të vërtetë, fokusi i pilates është të përmirësojë shëndetin e trupit dhe lëvizshmërinë, dhe jo vetëm estetikën. 

Pilates u zhvillua në fillim të shekullit të 20-të nga trajneri gjerman Joseph Pilates, fillimisht për rehabilitimin e ushtarëve të plagosur dhe për përmirësimin e lëvizjeve funksionale.

Me kalimin e kohës, fokusimi i tij kaloi nga rehabilitimi në një regjim të popullarizuar ushtrimesh, por parimet thelbësore mbeten të përqendruara në lëvizje të kontrolluara dhe të sakta që synojnë shëndetin e trupit, jo estetikën.
Thomas ka thënë se këto ushtrime janë për të gjithë, pavarësisht moshës apo aftësive.

Çfarë mund të bëjë pilates:

Forca dhe balanca: Forcon muskujt e thellë, përmirëson qëndrimin dhe balancën.

Fleksibilitet dhe lëvizshmëri: Aktivizon muskuj të ndryshëm përmes gamës së plotë të lëvizjes.

Shëndeti i nyjave: Pilates ndihmon në forcimin e ligamenteve, pa krijuar stres te nyjat.

Çfarë nuk mund të bëjë pilates:

Nuk rrit dukshëm masën muskulore: Nuk është mjaftueshëm për të ndërtuar muskuj të mëdhenj, pasi mungon ngarkesa progresive.

Nuk është aerobik: Nuk ofron përfitime kardiovaskulare si ecja, vrapimi apo noti.

Nuk ndryshon përbërjen trupore: Nuk ndihmon në humbje peshe ose në “tonifikimin” e trupit nëse nuk kombinohet me ushtrime të tjera si dhe dietë të shëndetshme.

Pilates janë ushtrime të mira për forcë dhe fleksibilitet, por kanë më shumë efekt kur bëhen pjesë e një programi të plotë fitnesi.

“Ushtrimi më i mirë është ai që ju pëlqen, sepse konsistenca është çelësi”, ka thënë Paul Longworth, trajner në PR Health and Fitness.