Daniel Simmons – artisti e aktivisti shembull

I lindur në Hollis, Queens në vitin 1953, Simmons ishte vëllai më i madh i sipërmarrësit të hip-hopit Russell Simmons dhe reperit Joseph Simmons, i njohur si Rev. Run në treshen “Run DMC”. Në vitin 1995, tre vëllezërit themeluan galerinë në New York, “Rush Arts” (e quajtur sipas nofkës së Russell) dhe “Rush Philanthropic Arts Foundation”, misioni i së cilës ishte të ofronte ekspozita, ngjarje, edukim artistik, bursa dhe grante për artistë me ngjyrë në kushte të pafavorshme

Artisti, aktivisti, filantropi dhe udhëheqësi i komunitetit Daniel “Danny” Simmons vdiq në moshën 72-vjeçare. Familja e tij së fundmi njoftoi për vdekjen, por nuk dha informacion për vendin, datën apo shkakun.

I lindur në Hollis, Queens në vitin 1953, Simmons ishte vëllai më i madh i sipërmarrësit të hip-hopit Russell Simmons dhe reperit Joseph Simmons, i njohur si Rev. Run në treshen “Run DMC”. Në vitin 1995, tre vëllezërit themeluan galerinë në New York, “Rush Arts” (e quajtur sipas nofkës së Russell) dhe “Rush Philanthropic Arts Foundation”, misioni i së cilës ishte të ofronte ekspozita, ngjarje, edukim artistik, bursa dhe grante për artistë me ngjyrë në kushte të pafavorshme. Simmons gjithashtu themeloi “Corridor Gallery” në apartamentin e tij në Brooklyn. Ai u zhvendos në Philadelphia në vitin 2015, ku themeloi një tjetër “Rush Arts”. Së bashku me Russell, ai krijoi emisionin e “HBO Def Poetry Jam”, i cili u transmetua nga viti 2002 deri në 2007. Një produksion në Broadway i këtij emisioni fitoi një çmim “Tony” për ngjarjen më të mirë të veçantë teatrale në vitin 2003. Simmons gjithashtu koleksiononte art afrikan dhe libra komikë.

Simmons e përshkroi stilin e tij artistik si “Neo-African Abstract Expressionism”. Veprat e tij gjenden në koleksionet e aktorit Will Smith dhe drejtuesit dhe producentit të industrisë muzikore Lyor Cohen, si dhe në organizata dhe institucione si “Chase Manhattan Bank”, “United Nations”, “Schomburg Center for Black Culture”, në New York  dhe “African American Museum” dhe Anacostia Community Museum të Smithsonian.

Ekspozita “Danny Simmons: The Journey to Everything” u shfaq në muzeun “Reginald F. Lewis” në Baltimore në vitin 2024 dhe në “Houston Museum of African American Culture” në vitin 2025. Në “BMoreArt”, Dora Marke shkroi se Simmons “sjell një panegjirik të realizuar bukur për paraardhësit që mund të mos i shohim, por që marrin materialitet në dhe përmes nesh”. Në vitin 2009, “Spanierman Gallery” organizoi një retrospektivë 15-vjeçare të punës së tij dhe në “New York Times”, Benjamin Genoccio shkroi se veprat “i japin formë gjërave,” duke shtuar: “Imazheria totemike dhe mitike është e bollshme, duke u dhënë pikturave më të mira forcë vizuale dhe një çuditshmëri shqetësuese. Loja dhe kapriçio janë gjithashtu të pranishme, qoftë në vijat e përdredhura të artistit apo në skemat e ngjyrave të theksuara”.

Simmons gjithashtu botoi disa libra me prozë, fiksion dhe poezi. Në vitin 2004, ai publikoi romanin “Three Days As The Crow Flies”, mbi skenën artistike të New Yorkut në vitet 1980, me “Atria Books”.

“New York Times” e quajti atë “një homazh i ngrohtë për argëtimin e çapkën të ditëve të mira të dikurshme”. Në vitin 2007 ai botoi “I Dreamed My People Were Calling But I Couldn’t Find My Way Home” me “Moore Black Press”, i ilustruar me punët e tij. Artistja Renee Cox e vlerësoi, duke thënë: “Pikturat janë mahnitëse, jashtëzakonisht krijuese dhe vendosen përkrah poezisë me gjuhë të rrugës që është aq lirike sa më bëri të ndihesha sikur po vallëzoja brenda pikturave”.

Në një intervistë të vitit 2017 me Griot, Simmons shprehu besimin e tij të thellë në art, duke thënë: “Arti shpëton jetë. Është kaq e thjeshtë”.

(Marrë nga The Art News)