Xherdan Shaqiri është shprehur i lumtur për arritjen e Kosovës dhe Shqipërisë në plejofin kualifikues për Botërorin e futbollit. Në një intervistë për “watson.ch”, Shaqiri kur ka folur për zgjerimin e listës së shteteve pjesëmarrëse në Botëror, ka thënë se është mirë që po u jepet shansi edhe shteteve më të vogla duke specifikuar Shqipërinë dhe Kosovën.
I pyetur se çfarë vlere do të kishte kualifikimi në Botëror për Kosovën, ylli i Baselit e ka vlerësuar si diçka të mrekullueshme.
“Do të ishte turneu i parë i madh. Fakti se ende kanë shans tregon për përparimin që është bërë. Mund ta shihni se vazhdimisht e më shumë lojtarë të mirë po duan të luajnë për Kosovën, se si po zhvillohen dhe se si mund t’i përballojnë edhe situatat me presion. Tani është një ekip me lojtarë nga liga të mira, gjë që ndihmon shumë”, ka thënë 34-vjeçari.
Së fundmi, Kosova arriti të dalë e dyta në Grupin kualifikues evropian për të arritur në fazën e plejofit për Botërorin e vitit të ardhshëm. Në grupe u përball me Zvicrën, që doli e para dhe u kualifikua direkt. Kosova la prapa edhe Slloveninë e Suedinë. Në plejof do të luajë në mars me Sllovakinë, ndërsa në rast fitore do ta presë në Prishtinë fituesin e duelit Turqi-Rumani për të prerë biletën për Botëror.
Shaqiri është me prejardhje nga Zhegra e Gjilanit, ndërsa ka luajtur me plot sukses në 125 ndeshje për përfaqësuesen e Zvicrës. Ishte prej më të mirëve në histori të kësaj përfaqësueseje.