Pas paraqitjes me Kosovën, Shaipi shkëlqen në Zvicër

Portieri Amir Shaipi po kalon moment të mirë në karrierë. Pas paraqitjes solide për Kosovën në fitoren 2:0 ndaj Sllovenisë në Lubjanë më 15 nëntor, Shaipi ishte në stol në barazimin 1:1 me Zvicrën në “Fadil Vokrri”, më 18 nëntor. Aro Muriq u kthye nga suspendimi dhe ishte portier i parë në atë ndeshje.

Shaipi vazhdon të jetë portier i dytë te Kosova, por po jep shenja se po e kthen  “pozitën” e portierit të parë te Lugano, skuadra e Superligës së Zvicrës në futboll.

Shaipi për kohë shumë të gjatë ishte portier i parë i Luganos. Megjithatë pësoi rënie në formë në verë dhe ky klub mori huazim nga Young Boysi portierin me përvojë, David von Ballmos. Ai ishte portier i parë që nga fillimi i shtatorit, duke e zhvendosur Shaipin në stol, por u lëndua në fillim të nëntorit.

Kështu Shaipi e fitoi rastin ndaj Baselit më 9 nëntor dhe pati paraqitje të mirë. Ndërkohë po vlerësohet më meritori për fitoren 1:0 të Luganos ndaj Thunit, të shtunën mbrëma. I kishte nëntë pritje.

Gazeta e madhe zvicerane, “Blick”, ka publikuar të dielën një shkrim për Shaipin dhe kthimin e tij në formë. “Blick” ka shkruar se Shaipi me pritje të suksesshme dhe qetësinë e shfaqur në momentet kritike, ka udhëhequr Luganon drejt fitores.

“Blick” ka vlerësuar se Shaipi ishte “faktor vendimtar” në fitoren 1:0 të Luganos në udhëtimin e vështirë te Thuni. 25-vjeçari po e shfrytëzon maksimalisht mundësinë e ofruar.

“Me besim, reagim të shpejtë dhe prani të vazhdueshme, ai vazhdimisht ka mohuar golin e Thunit. Shaipi qëndroi i ftohtë, bëri pritje dhe i dha ekipit besimin e duhur”, ka shkruar gazeta zvicerane, ndër të tjera.

Uran Bislimi i Luganos u ndëshkua me karton të kuq në mesin e pjesës së dytë, por kjo nuk pati ndikim në përqendrimin dhe paraqitjen e Shaipit.

“Fakti që e kemi mbajtur portën e paprekur e bën më të veçantë për mua”, ka thënë Shaipi. Ai megjithatë ishte modest.

“Falënderimet i takojnë gjithë skuadrës. Pa përkrahjen e lojtarëve këto pritje nuk do të ishin të mundura”.

Trajneri Mattia Croci-Torti, ka lavdëruar portierin kosovar.

“Ai nuk kishte konkurrencë për kohë të gjatë. Tani i kemi krijuar konkurrencë dhe ai ka reaguar shkëlqyeshëm”, ka thënë Croci-Torti.

Shaipi e kishte pranuar rëndë vendimin që të zhvendosej në stol. Por duket që ka reaguar mirë.

“Familja ime dhe trajneri i portierëve më kanë shtyrë gjithnjë para. Tani mund t’i pranoj këto momente dhe t’i shijoj. Por ende ka shumë punë për të bërë”, ka thënë Amir Shaipi.

Forma e tij është e rëndësishme edhe për Kosovën. Edhe Aro Muriqit i duhet konkurrenca e shëndoshë, ndërsa përfaqësueses një portier tjetër cilësor, nëse Aro mungon për ndonjë arsye.