LIVE: Ndeshjet e Superligës

Drenica fiton në Superligë pas tre muajsh

Drenica ka fituar pas një kohe të gjatë në elitën e futbollit të Kosovës dhe pikët e plota i kanë ndihmuar të ngjitet për dy pozita në tabelë. 

Drenica e ndali ecurinë e tri fitoreve rresht të Gjilanit të shtunën në kuadër të xhiros së 24-t të Superligës, pas fitores 1:0. 

Ndeshja u luajt në terrenin me bar sintetik në Gjilan, ndërsa golin e fitores e shënoi Kreshnik Uka nga penalltia, në minutën e 22-të. 

Ndërhyrja e Sabit Bilalit në zonë në Igball Jasharin e Drenicës, u konfirmua me VAR nga gjyqtari Alban Shala që sinjalizoi në penallti. 

Jashari shënoi supergol për Drenicën në minutën e 67-të, por goli i tij u anulua pasi gjatë ndërtimit të aksionit, gjyqtari Shala pa prekje me dorë në rishikimin e situatës në VAR. 

Për Drenicën ishte fitorja e parë që prej 13 dhjetorit të vitit të kaluar. Pati ecuri prej gjashtë ndeshjeve pa fitore, me dy barazime e katër humbje. 

Gjilani në Superligë e pësoi humbjen e parë që prej 8 shkurtit. 

Drenica në pozitën e nëntë, përkatësisht të parafundit, tani i ka 25 pikë. Ferizaj i teti, në pozitën e barazhit, i ka 24 pikë, ndërsa Prishtina e Re në vendin e fundit i ka 23 pikë. 

Gjilani në vendin e pestë i ka 36 pikë.
 

Përballja prishtinase mbyllet baras

Dy skuadrat me emrin Prishtina u takuan të shtunën në stadiumin “Fadil Vokrri”, për përballjen e xhiros së 24-t të Superligës së Kosovës në futboll.

Dhe si Prishtina ashtu edhe Prishtina e Re, fituan nga një pikë nga ky ballafaqim. 

Ndeshja u mbyll me rezultatin e barabartë, 1:1. 

Për Prishtinën ishte lëshim i pikëve në garën për titull kampioni, kurse për Prishtinën e Re, pikë e rëndësishme në garën për mbijetesë. 

Prishtina mbetet pa fitore në katër ndeshjet e fundit, ku ka ecuri prej dy barazimeve e dy disfatave. 

Dy barazime e një disfatë i ka Prishtina e Re në tri ndeshjet e fundit. 

Prishtina kaloi në epërsi në minutën e 37-të. Mario Ilievski e shënoi golin e epërsisë, që u pranua pas rishikimit të situatës në VAR nga gjyqtari Egzon Dakaj. 
Ilievski u asistua nga Blend Baftiu, që përfitoi pas gabimit të një futbollisti kundërshtar. 

Sfida u vendos me golin e sulmuesit Astrit Berisha, që shënoi në minutën e 73-të. 

Prishtina mbetet në pozitën e tretë me 38 pikë, kurse Prishtina e Re në fundin e tabelës i ka 23 pikë.

Ferizaj mposht Malishevën me gol të minutave shtesë

Ruben Silva ishte i saktë në tentimin që e pati në minutën e 92-të të ndeshjes dhe ia ka siguruar Ferizajt një fitore shumë të rëndësishme në garën për mbetje në elitën e futbollit kosovar. 

Ferizaj të shtunën pasdite fitoi 2:1 në udhëtim te Malisheva, në ndeshjen e xhiros së 24-t të Superligës që u zhvillua në stadiumin “Liman Gegaj” në Malishevë. 

Me fitore, Ferizaj ngjitet në pozitën e tetë, përkatësisht të barazhit, me 26 pikë. Në pozitën e parafundit, të nëntën, është Drenica me 25 pikë, ndërsa Prishtina e Re në pozitën e fundit i ka 23 pikë.

Malisheva mbetet në pozitën e katërt me 37 pikë, një më pak se Prishtina që është e treta. 

Dy golat e parë u realizuan nga penalltia. 

Malisheva kaloi në epërsi në minutën e 12-të me golin e Mevlan Zekës. Penalltia u dha me VAR, pasi gjyqtari Mervan Bejtullahu pa prekje me dorë të Ade Ogunsit në zonë. 

Tjetër penallti u dha pas rishikimit të situatës në VAR nga gjyqtari Bejtullahu. 

Për 1:1 në minutën e 35-të për Ferizajn shënoi pikërisht Ade Oguns, i cili e shkaktoi penalltinë në golin e Malishevës.

Goli i fitores për ferizajasit erdhi në minutën e dytë të kohës shtesë.

Prishtina e Re barazon rezultatin

Astrit Berisha i Prishtinës së Re ka shënuar gol në minutnë e 73-të ndaj Prishtinës dhe e ka barazuar rezultatin në “Fadil Vokrri”. 

Tani shifrat janë 1:1. 

Berisha u shkëput lartë në zonë dhe shënoi me kokë.

Prishtina në pushim me epërsi pas golit të Ilievskit

Për Prishtinën shënoi Mario Ilievski në minutën e 37-të. 

Dhe me golin e sulmuesit nga Maqedonia e Veriut, Prishtina ka shkuar në pushim me rezultatin 1:0 në ndeshjen ndaj Prishtinës së Re.

Në “Liman Gegaj” baras pas pjesës së parë

Malisheva dhe Ferizaj kanë luajtur baras pas pjesës së parë në ndeshjen që po zhvillohet në stadiumin “Liman Gegaj”. 

Për Malishevën shënoi Mevlan Zeka në minutën e 12-të, ndërsa Ade Aguns i barazoi shifrat në minutën e 35-të. 

Të dyja golat u shënuan nga penalltia, të cilat u dhanë pas rishikimeve të situatave në VAR nga gjyqtari Mervan Bejtullahu.

Drenica në epërsi ndaj Gjilanit pas pjesës së parë

Drenica e ka mbyllur pjesën e parë me epërsi 1:0 në udhëtim te Gjilani. 

Golin e shënoi Kreshnik Uka nga penalltia në minutën e 22-të.

Prishtina në epërsi ndaj Prishtinës së Re

Prishtina ka kaluar në minutën e 37-të në epërsi ndaj Prishtinës së Re, në ndeshjen e xhiros së 24-t të Superligës së Kosovës në futboll. 

Mario Ilievski e shënoi golin e epërsisë 1:0. 

Goli u pranua pas rishikimit të situatës në VAR nga gjyqtari Egzon Dakaj. 

Ilievski u asistua nga Blend Baftiu, që përfitoi pas gabimit të një futbollisti kundërshtar. 

Ndeshja po luhet në stadiumin “Fadil Vokrri” në Prishtinë.

Tjetër gol nga penalltia në “Liman Gegaj”

Tjetër penallti është dhënë pas rishikimit të situatës në VAR nga gjyqtari Mervan Bejtullahu. 

Dhe tjetër gol është shënuar nga pika e bardhë në stadiumin “Liman Gegaj” në Malishevë. 

Tani për 1:1 në minutën e 35-të për Ferizajn shënoi pikërisht Ado Aguns, i cili e shkaktoi penalltinë në golin e Malishevës.

Drenica po e befason Gjilanin

Drenica është duke e befasuar Gjilanin në duelin e xhiros së 24-t të Superligës së Kosovës në futboll, që po luhet në terrenin me bar sintetik në Gjilan. 

Kreshnik Uka realizoi nga penalltia në minutën e 22-të. 

Ndërhyrja e Sabit Bilalit në zonë në Igball Jasharin e Drenicës, u konfirmua me VAR nga gjyqtari Alban Shala që sinjalizoi në penallti. 

Uka ishte i pagabueshëm më pas për 1:0.

Malisheva në epërsi ndaj Ferizajt

Malisheva ka kaluar në epërsi ndaj Ferizajt në ndeshjen e xhiros së 24-t të Superligës së Kosovës në futboll. 

Mevlan Zeka realizoi nga penalltia në minutën e 12-të. 

Penalltia u fitua pas rishikimit të situatës në VAR.

Gjyqtari Mervan Bejtullahu pa prekje me dorë të Ade Ogunsit në zonë dhe sinjalizoi në pikën e barhdë. 

I pagabueshëm ishte Zeka për 1:0.