Bayern Leverkusen – Borussia Dortmund është kryendeshja e xhiros së 12-të në Bundesligën gjermane. Kjo ndeshje luhet të shtunën nga ora 18:30.
Të dy skuadrat hyjnë në këtë ndeshje pas fitoreve që i arritën në Ligën e Kampionëve.
Leverkuseni të martën shënoi fitore të madhe duke e mposhtur 2:0 Manchester Cityn si mysafir. Edhe Dortmundi të martën e mposhti Villarrealin me rezultatin 4:0, në shtëpi.
Leverkuseni dhe Dortmundi janë dy skuadrat që deri në fund pritet ta rivalizojnë Bayern Munchenin në garën për titull kampioni.
Leverkuseni ka 23 pikë në pozitën e tretë. Dortmundi ka një pikë më pak në vendin e katërt. Lider është Bayerni me 31 pikë.
Leverkuseni ka katër fitore në pesë ndeshjet e fundit në elitë. Është në seri të mirë të rezultateve.
Dortmundi në dhjetë ndeshjet e fundit në të gjitha garat numëron pesë fitore, tri barazime dhe dy humbje.
Në pesë ndeshjet e fundit mes dy skuadrave, Dortmundi ka dy fitore, Leverkuseni ka një, kurse dy ndeshje nuk kanë dhënë fitues.
Po të shtunën kampioni në fuqi, Bayerni, nga ora 15:30 e pret St. Paulin.
St. Pauli ka shtatë pikë në pozitën e 16-të.
Bayerni pësoi 3:1 në udhëtim tek Arsenali të mërkurën mbrëma në Ligën e Kampionëve, por në Bundesligë qëndron shumë mirë me rezultate.
Edhe nëse mposhten të shtunën në “Allianz Arena” nga St. Pauli, bavarezët do të jenë liderë të tabelës.