Presidenti i Lillet, Olivier Letang, është pyetur sërish për situatën e sulmuesit të Kosovës, Edon Zhegrova.
Të premten mediumet franceze raportuan se Zhegrova ka arritur marrëveshje personale me Marseillen. Por të gjitha këto raportime i ka demantuar presidenti i Lillet, Letang.
Ai në një intervistë për “Canal+” shtoi se një lojtar nuk mund të bisedojë me një klub tjetër pa autorizimin e klubit të tij. Ai deklaroi se nuk ka pasur ofertë nga Marseille për sulmuesin e krahut.
“A ka një marrëveshje midis Marseillet dhe Edon Zhegrovës? Jam shumë i befasuar nga ajo që po më thoni, sepse rregulloret janë mjaft të qarta. Lojtari nuk mund të flasë me klub tjetër pa autorizim të klubit të tij. Nuk jam kontaktuar nga Olympique de Marseille. Nuk kam pasur asnjë kërkesë për të qenë në gjendje të flas me lojtarin tim”, ka thënë Letang.
Kanë mbetur edhe dy ditë deri në përfundimin e afatit kalimtar të kësaj vere.
26-vjeçari Zhegrova ka kohë që e ka kërkuar largimin nga Lille.
Prej skuadrave që janë të interesuara për t’i siguruar shërbimet e tij është edhe gjiganti italian, Juventus.