Roma – Napoli dhe Milan – Lazio janë dy ndeshjet më interesante në kampionatin italian të futbollit këtë fundjavë.
Derbi i zjarrtë mes Romës dhe Napolit luhet të dielën nga ora 20:45 dhe i takon javës së 13-të të Serie A. Do të përballen dy skuadra që luftojnë për titullin e kampionit. Roma është në vendin e parë me 27 pikë. Napoli e zë vendin e tretë me dy pikë më pak.
Napolitanët janë kampionë në fuqi të elitës italiane të futbollit.
Napoli është i pamposhtur në dhjetë nga 11 ndeshjet e fundit kundër Romës në të gjitha garat.
Roma dhe Napoli janë përballur në 178 ndeshje. Roma prin me 66 fitore. 54 fitore i ka Napoli, kurse 58 ndeshje kanë përfunduar baras.
Roma ka gjashtë fitore në shtatë ndeshjet e fundit. Ndërsa Napoli në shtatë ndeshjet e fundit ka katër fitore, dy barazime dhe një humbje.
Roma këtë edicion ka mbrojtjen më të mirë. Pas 12 xhirove të luajtura ka pësuar vetëm gjashtë gola.
Ndërkohë sulmin më të mirë e ka Interi me 26 gola të shënuar.
Derbi tjetër mes Milanit dhe Lazios luhet të shtunën nga ora 20:45.
“Kuqezinjtë” kanë 25 pikë në vendin e dytë. Milani nuk di për humbje në 12 ndeshjet e fundit. Ka regjistruar tetë fitore dhe katër barazime.
Lazio ka vetëm një humbje në tetë ndeshjet e fundit. Në kampionat ka 18 pikë në vendin e tetë.
Me ndeshjen që zhvillohet të hënën ndërmjet Bolognas dhe Cremoneses, nga ora 20:45, përfundon xhiroja e 13-të.