Prishtina e Re dhe Prishtina takohen në kuadër të xhiros së 15-të të Superligës së Kosovës në futboll.
Kjo ndeshje megjithatë luhet në stadiumin “Sami Kelmendi” në Lipjan, ku Prishtina e Re po paraqitet si vendase. Ndeshja luhet të shtunën nga ora 13:00.
Prishtina është lidere me 26 pikë. Te kjo skuadër në postin e trajnerit është kthyer Afrim Tovërlani. Ai e zëvendësoi Arsim Thaqin.
Trajnerin e ka ndërruar edhe Prishtina e Re, që është e fundit me vetëm 11 pikë. Pas dorëheqjes së Shpëtim Babajt, Qëndrim Kida mori drejtimin e kësaj skuadre.
Të shtunën është edhe ndeshja mes Drenicës dhe Gjilanit, që po ashtu fillon në ora 13:00.
Të dielën janë tri takime të tjera: Ferizaj – Malisheva, Llapi – Dukagjini dhe Drita – Ballkani.