Dy prej ekipeve kryesore këtë edicion në Premier League do të përballen në “Stamford Bridge” këtë fundjavë.
Derbi i Londrës, mes Chelseat dhe Arsenalit, do të jetë edhe ndeshja më interesante e xhiros së 13-të të kampionatit anglez.
Ndeshja zhvillohet të dielën nga ora 17:30. Ky ballafaqim edhe do ta mbyllë xhiron e 13-të.
Arsenali i prin tabelës me 29 pikë, kurse Chelsea është në pozitën e dytë me gjashtë pikë më pak.
Dy skuadrat janë në formë të mirë, si në elitë ashtu edhe në Ligën e Kampionëve.
Chelsea dhe Arsenali në mesjavë shënuan fitore në Ligën e Kampionëve.
Chelsea të martën fitoi thellë, 3:0, ndaj Barcelonës në kuadër të xhiros së pestë të fazës së ligës në “Champions”. Ndërsa Arsenali të mërkurën e mposhti Bayern Munchenin me rezultatin 3:1.
Fitorja ndaj Barcelonës e konfirmoi formën e mirë që është duke e kaluar Chelsea. Skuadra e trajnerit Enzo Maresca ka pesë fitore në gjashtë ndeshjet e fundit.
Në seri të mirë janë edhe “topçinjtë”. Nuk dinë për humbje në 16 ndeshjet e fundit. Kanë 14 fitore dhe dy barazime.
Ndeshja e së dielës në “Stamford Bridge” do të jetë e 98-a mes Chelseat dhe Arsenalit.
Fitorja e fundit e Chelsat në shtëpi ndaj Arsenalit ishte në gusht të vitit 2018.
Arsenali ka humbur vetë një nga 11 ndeshjet e fundit në Premier League ndaj Chelseat. Mikel Arteta nuk ka humbur asnjë ndeshje në “Stamford Bridge” si trajner i Arsenalit.
Xhiroja e 13-të pritet të ofrojë edhe disa ndeshje të tjera interesante.
Kampioni në fuqi, Liverpooli, luan po ashtu të dielën. Nga ora 15:05 luan ndaj West Ham Unitedit në udhëtim. “Të kuqtë” kanë mbetur prapa në garën për titull kampioni.
Liverpooli ka 18 pikë dhe e zë vendin e 12-të. West Ham Unitedi e zë vendin e 17-të me 11 pikë.
Skuadra e Arne Slotit është në krizë të thellë të rezultateve. Ka tri disfata radhazi.