Xherdan Shaqiri ishte lojtari më i mirë i ndeshjes në fitoren që Baseli e realizoi të enjten mbrëma në shtëpi ndaj FCSB-së rumune.
Shaqiri realizoi dy gola dhe asistoi në golin e tretë, në fitoren 3:1.
Ndeshja i takoi xhiros së katërt të fazës së ligës në Ligën e Evropës dhe u zhvillua në stadiumin “St. Jakob-Park”.
Mysafirët mbetën me një lojtar më pak në fushë nga minuta e 12-të kur me të kuq u ndëshkua Stefan Tranovanu, ndërsa “panenka” e Shaqirit ia dha epërsinë 1:0 Baselit në minutën e 19-të.
Darius Olaru i barazoi shifrat në minutën e 57-të për rumunët.
Por në minutën e 73-të, në skenë u shfaq sërish Shaqiri që shënoi nga afërsia për 2:1. Ai realizoi pas topit të kthyer nga shtylla pingule. Ishte goli i tretë në katër ndeshje për Shaqirin në Ligën e Evropës.
Shaqiri nuk u ndal me kaq. Për ta kompletuar ndeshjen e përkryer, 34-vjeçari asistoi në golin që e shënoi Ibrahim Salah, një minutë para fundit.
Baseli në katër ndeshje ka gjashtë pikë, kurse FCSB-ja mbetet me tri pikë.
Baseli në epërsi me golin e Shaqirit
Baseli e ka mbyllur me epërsi minimale 1:0 pjesën e parë të ndeshjes kundër klubit rumun, FCSB.
Kjo ndeshje po luhet në “St. Jakob-Park” në Basel dhe i takon xhiros së katërt të Ligës së Evropës.
Golin e vetëm për Baselin e shënoi kapiteni Xherdan Shaqiri. Ai ishte i saktë nga penalltia në minutën e 19-të.
Gjyqtar kryesor i ndeshjes në Basel është Juxhin Xhaja i Shqipërisë. Edhe asistentët e tij dhe gjyqtari i katërt janë nga Shqipëria.