Meksika e hap Botërorin ndaj Afrikës së Jugut

Ndeshja e parë e Kupës së Botës në futboll i takon Grupit A. Njëra prej nikoqireve të Botërorit, Meksika, takohet me Afrikën e Jugut në Mexiko City, më 11 qershor nga ora 21:00, sipas kohës në Kosovë.

Çekia dhe Koreja e Jugut janë përfaqësueset tjera të Grupit A.

Shumica e ndeshjeve të këtij grupi do të luhen në Meksikë, dy në Mexico City, dy në Guadalajara dhe një në Monterrey. Ndeshja e vetme jashtë Meksikës do të luhet në Atlanta më 18 qershor në mes të Çekisë dhe Afrikës së Jugut.

Dy prej ndeshjeve të Meksikës do të luhen në stadiumin e renovuar, “Azteca”, që ka pritur finalet e Botërorëve 1970 e 1986.

Meksika

Duke organizuar Botëror për herë të parë pas 40 vjetësh, Meksika shpreson të rikuperohet nga eliminimi në fazën grupore katër vjet më parë në Katar. Nga viti 1994 e deri në vitin 2018, meksikanët rregullisht janë eliminuar në një të tetën e finales.

Meksika arriti në çerekfinale në Botërorët që i organizoi vet, në vitet 1970 dhe 1986.

Shumë prej shpresave të meksikanëve varen nga 17-vjeçari Gilberto Mora, që vitin e kaluar u bë më i riu që luajti për të rriturit e Meksikës, në moshën 16-vjeçare.

Veterani Javier Aguirre e drejton si selektor Meksikën. Ai e mori drejtimin e përfaqësueses në vitin 2024. Aguirre për herë të tretë drejton Meksikën.

“E vlerësoi veten me fat”, ka thënë Aguirre, ish-lojtar i Meksikës.

“Për çdo ditë që jam këtu jam mirënjohës. Jam meksikan dhe jam i lumtur për atë që po e bëj. Momenti më i mirë në karrierën time si trajner është në horizont”.

Afrika e Jugut

Afrika e Jugut kthehet në ngjarjen globale pas pjesëmarrjes në Botërorin 2010 që u organizua pikërisht në këtë vend.

Me gjithë një fitore të bujshme, 2:1 ndaj Francës, Afrika e Jugut ishte bërë nikoqirja e parë e Botërorit e eliminuar në fazën grupore.

Afrika e Jugut ka garuar edhe në Botërorin 1998 dhe 2002, kur po ashtu ishte eliminuar në fazën grupore.

Afrika e Jugut u kualifikua për Botërorin në SHBA, Meksikë e Kanada duke e mposhtur fuqinë afrikane, Nigerinë, në grupin kualifikues.

Belgu Hugo Broos është përzgjedhës. Ai është në krye të përfaqësueses jug-afrikane që nga viti 2021. Përfaqësuesja e Afrikës së Jugut është e përbërë kryesisht nga lojtarë të klubeve të këtij vendi.

Koreja e Jugut

Koreja e Jugut do të paraqitet për herë të 12-të në Botëror, më shumë se çdo përfaqësuese tjetër aziatike. 

Suksesi më i madh i saj është vendi i katërt në turneun që e organizoi së bashku me Japoninë, në vitin 2002.

Prej atëherë, jug-koreanët asnjëherë nuk kanë shkuar më larg se një e teta e finales.

Katër vjet më parë në Katar, Koreja e Jugut u rendit e dyta në grup. Mbeti prapa Portugalisë në grupin ku ishin edhe Uruguaji dhe Gana. Koreja e Jugut u eliminua nga Brazili në një të tetën e finales, duke u mposht 4:1.

Ekipi ishte i pamposhtur në kualifikimet aziatike, por nuk impresionoi në miqësoret e fundit, duke pësuar 4:0 nga Bregu i Fildishtë dhe 1:0 nga Austria.

Korenë e Jugut në fushë do ta udhëheqë Son Heung-min, ish-ylli i Tottenhamit që tani luan për Los Angeles në SHBA.

Lee Kang-in, mesfushori i PSG-së dhe mbrojtësi i Bayernit, Kim Min-jae, janë yje të tjerë të Koresë së Jugut.

Hong Myung-bo e mban postin e selektorit prej vitit 2024, në periudhën e dytë në krye të përfaqësueses. Ai ishte kapiten i ekipit që arriti në gjysmëfinale të Botërorit në vitin 2002.

Ndeshja mes Koresë së Jugut dhe Çekisë është e dyta e Botërorit. Zhvillohet në Guadalajara më 12 qershor nga ora 4:00, sipas kohës në Kosovë.

Çekia

Çekisë i janë dashur penalltitë për ta mposhtur Danimarkën në finale të plejofit për kualifikimin e parë në Botëror që nga viti 2006.

20 vjet më parë Çekia ishte prej favoriteve, por dëshpëroi duke mos e kaluar grupin ku ishin edhe Italia, Gana dhe SHBA-ja.

Ish-kapiteni, Vladimir Darida, 35-vjeçar, është pajtuar të kthehet nga pensionimi për ta ndihmuar Çekinë të kualifikohet në Botëror. Darida ishte tërhequr në vitin 2021, pasi Çekia ishte eliminuar në çerekfinale të Evropianit.

74-vjeçari Miroslav Koubek është selektor. 

Çekia luan miqësore me Kosovën më 31 maj në Pragë. Më pas udhëton për në SHBA.