Rusia ka pritshmëri të larta për udhëtimin e presidentit, Vladimir Putin në Kinë këtë javë, dhe të dyja palët do ta përdorin atë për të zhvilluar "partneritetin e tyre të privilegjuar", ka thënë Kremlini të hënën.
Putini do ta vizitojë Kinën të martën dhe të mërkurën, më pak se një javë pasi presidenti i SHBA-së Donald Trump shkoi atje për bisedime me presidentin Xi Jinping.
"Kemi pritshmëri shumë serioze për këtë vizitë", ka thënë zëdhënësi i Kremlinit, Dmitry Peskov.
I ashtuquajturi partneritet "pa kufij" midis Kinës dhe Rusisë, prodhuesit më të madh të burimeve natyrore në botë, është forcuar që kur Perëndimi vendosi sanksione për të ndëshkuar Rusinë për luftën në Ukrainë.
"Ne dhe miqtë tanë kinezë i referohemi asaj si një partneritet veçanërisht i privilegjuar dhe strategjik", ka shtuar Peskov.
Delegacioni rus do të përfshijë zëvendëskryeministra përkatës, ministra qeverie dhe drejtues kompanish, ka njoftuar ai.
Edhe
Putini i thotë Xi-së se marrëdhëniet Rusi-Kinë kanë arritur një nivel të paparë
Peskov është pyetur nëse do të diskutoheshin planet për gazsjellësin e propozuar "Fuqia e Siberisë 2", i cili një ditë mund të transportojë 50 miliardë metra kub shtesë në vit nga fushat e gazit në Arktik të Rusisë nëpërmjet Mongolisë në Kinë.
"Të gjitha çështjet që janë në agjendën ekonomike të marrëdhënieve tona dypalëshe do të trajtohen natyrshëm", është përgjigjur ai.
