-
Përktheu:
Flutura Gashi-Mehmeti
- 6 qershor 2024 09:41
- Shpërndaje në:
Organizata Botërore e Shëndetësisë (OBSH) ka thënë se vdekja e një burri në Meksikë ishte shkaktuar nga një lloj gripi i shpendëve, i quajtur H5N2, i cili nuk është gjetur kurrë më parë te një njeri.
OBSH-ja ka bërë të ditur të mërkurën se nuk ishte e qartë se si u infektua personi.
“Edhe pse burimi i ekspozimit ndaj virusit në këtë rast është aktualisht i panjohur, viruset A(H5N2) janë raportuar në shpendët në Meksikë”, thuhet në një deklaratë, raporton The Guardian.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoShkencëtarët janë në gatishmëri për ndryshimet në virus që mund të sinjalizojnë se gripi i shpendëve po përshtatet për t'u përhapur më lehtë te njerëzit.
Por sipas OKB-së të mërkurën, rreziku aktual i virusit të gripit të shpendëve për popullatën e përgjithshme në Meksikë është i ulët.
Burri 59-vjeçar, i cili ishte shtruar në spital në Mexico City, vdiq më 24 prill pasi pati ethe, gulçim, diarre, të përziera dhe siklet të përgjithshëm, ka bërë të ditur OBSH-ja.
Ministria e Shëndetësisë e Meksikës shtoi në një deklaratë të mërkurën se deri më tani nuk kishte prova të transmetimit nga personi në person të gripit të shpendëve në rastin e burrit që vdiq. Ndërkaq, të gjithë njerëzit që kanë pasur kontakt me të kanë rezultuar negativë.
Në mars, qeveria e Meksikës raportoi një shpërthim të A(H5N2) në një njësi të izoluar familjare në shtetin perëndimor Michoacan të vendit, por tha se në atë kohë nuk përfaqësonte një rrezik për fermat e largëta tregtare, as për shëndetin e njeriut.
Pas vdekjes së burrit 59-vjeçar, autoritetet meksikane konfirmuan praninë e virusit dhe raportuan rastin në OBSH.
Shkencëtarët kanë thënë se rasti në Meksikë nuk ka lidhje me shpërthimin e një lloji tjetër të gripit të shpendëve - H5N1, në Shtetet e Bashkuara, që ka infektuar deri më tani tre punëtorë të fermave të qumështit.
Varietetet e tjera të gripit të shpendëve kanë vrarë njerëz në të gjithë botën në vitet e mëparshme, duke përfshirë 18 njerëz në Kinë gjatë një shpërthimi të H5N6 në vitin 2021.