Sorensenit do t’i zgjatet mandati edhe për dy vjet si ndërmjetës në dialog Kosovë–Serbi

Burimet diplomatike pranojnë se dialogu është në krizë, por për këtë fajin ua lënë Kosovës dhe Serbisë e jo ndërmjetësit të BE-së.

Danezi Peter Sorensen do të vazhdojë edhe për së paku dy vjet si i dërguar i posaçëm i Bashkimit Evropian për dialog mes Kosovës dhe Serbisë. Për këtë janë pajtuar tashmë vendet anëtare dhe pritet që në javët në vijim kjo gjë vetëm të formalizohet. Mësohet kjo nga burimet diplomatike në Bruksel, të cilat thonë se paralelisht Këshilli i BE-së duhet edhe të miratojë buxhetin për punën e ekipit të Sorensenit. Për vazhdimin e mandatit të Sorensenit propozimin e kishte dhënë sipas procedurave Përfaqësuesja e Lartë për politikë të jashtme dhe siguri Kaja Kallas dhe me këtë, pas disa diskutimeve në strukturat e Këshillit, janë pajtuar vendet anëtare.

Mandati i tashëm skadon në muajin shkurt të vitit që vjen, pasi ai fillimisht ishte emëruar në këtë post për vetëm 13 muaj. Kjo pasi në atë kohë në BE nuk ishin të sigurt se në çfarë mënyre mendojnë t’i qasen dialogut pas përfundimit të mandatit të Miroslav Lajçak.

Burimet diplomatike pranojnë se dialogu është në krizë, por për këtë fajin ua lënë Kosovës dhe Serbisë e jo ndërmjetësit të BE-së.

Edhe në dokumentet e BE-së, si në raportet e Progresit ashtu edhe në draftin e konkluzioneve të cilat pritet të miratohen në takimin e Këshillit të BE-së, thuhet se as Kosova e as Serbia nuk i kanë kryer në mënyrë të duhur obligimet nga dialogu.

Gjatë vitit të parë të mandatit të Sorensen në postin e të dërguarit të posaçëm për dialog nuk ka pasur fare takime në nivel të lartë, ndërsa takimet në nivel të kryenegociatorëve nuk kanë prodhuar asnjë progres. Ato takime janë shfrytëzuar vetëm për të shkëmbyer akuzat e palëve ndaj njëra-tjetrës, ndërsa BE-ja vetëm ka shprehur pakënaqësi për mungesën e vullnetit të palëve për të kryer obligimet e tyre.

Për mungesë të progresit në dialog, BE-ja kësaj radhe shkakun e gjen te situata e brendshme politike si në Kosovë ashtu edhe në Serbi. Por edhe në këto kushte thonë se Përfaqësuesja e Lartë, Kaja Kallas, mbetet e gatshme të organizojë një takim të nivelit të lartë sapo palët të jenë të gatshme për këtë. Por kjo nuk pritet të ndodhë para se të përmbyllet procesi i zgjedhjeve të reja në Kosovë dhe të themelohet qeveria pas tyre.

Edhe pse nuk ka pasur progres në dialog, në BE besojnë se ai mund të ringjallet dhe se palët do ta kuptojnë dëmin që ua bëjnë vendeve të tyre në rast se nuk bëjnë progres në procesin e normalizimit të raporteve, pasi ai progres është edhe kusht për rrugëtimin e tyre evropian si dhe për përfitime nga Plani i Rritjes për Ballkanin Perëndimor.