Lista Serbe mund të shpallet antikushtetuese, tek pas një hetimi penal

Përfshirja eventuale e Listës Serbe në sulmin terrorist në Banjskë të Zveçanit dhe largimi i saj nga Kuvendi i Kosovës, mund të bëhet vetëm nga organet e drejtësisë. Juristi Ehat Miftaraj, thotë se vendimit të tillë duhet t’i paraprijë një hetim penal

Lista Serbe, e cila përfaqëson serbët në Kuvendit të Kosovës, nuk është distancuar nga veprimet e nënkryetarit të derisotëm të saj, Milan Radojçiq, i identifikuar nga autoritetet si organizator kryesor i sulmit terrorist në Banjskë të Zveçanit.

Kjo parti ka shpallur tri ditë zie për tre terroristët të cilët u vranë nga Policia e Kosovës dhe në nderim të tyre në institucionet e saj paralele ka ulur në gjysmë shtizë flamurin serb. Autoritetet në Kosovë kanë paralajmëruar ndërmarrjen e veprimeve ligjore në raport me përfshirjen eventuale të këtij subjekti politik në sulmin që la të vdekur polici Afrim Bunjaku.

Sipas Ligjit për Zgjedhjet e Përgjithshme, një subjekti politik mund t’i ndalohet veprimtaria kur është e domosdoshme për të siguruar rendin publik e për ta parandaluar dhunën dhe krimin.

“Ndalohet regjistrimi i një partie në rastet kur është e domosdoshme për të siguruar rendin publik, shëndetin publik, sigurinë kombëtare, parandalimin e çrregullimeve, dhunës dhe krimit, ose mbrojtjen e të drejtave të të tjerëve”, thuhet në nenin 14 të ligjit.

E, në Rregullën e KQZ-së për regjistrimin dhe veprimin e partive politike precizohet se një subjekt politik mund të çregjistrohet me vendim gjykate.

“Me vendimin e KQZ-së, Zyra e fshin nga regjistri i partive politike nëse sanksioni penal kundër subjektit politik të regjistruar do të thotë çregjistrim i atij subjekti politik siç përcaktohet nga gjykata”, thuhet ndër të tjera në këtë rregull.

Këtë e pohon edhe drejtori ekzekutiv i Institutit të Kosovës për Drejtësi (IKD), Ehat Miftaraj, i cili ka sqaruar procedurën që duhet ndjekur.

“Në mënyrë që Lista Serbe të shpallet parti kundërkushtetuese duhet të kemi një hetim penal, i cili hetim duhet ta vërtetojë, ta dëshmojë me fakte që Lista Serbe është pjesë e aksioneve, veprimeve të dhunshme që për qëllim kanë cenimin e rendit kushtetues dhe juridik në Republikën e Kosovës”, ka thënë ai.

Tek të premten, nëpërmjet një letre, Radojiçiq ka dhënë dorëheqje nga pozita e nënkryetarit të partisë kryesore të serbëve të Kosovës.

Miftaraj ka theksuar se përfshirja e Radojçiqit në sulmin e Banjskës nuk është dëshmi e mjaftueshme për organet e drejtësisë për ta çregjistruar Listën Serbe.

“Komisioni Venecias e ka përcaktuar se veprimet e një anëtari të një partie të caktuar politike jo domosdoshmërisht nënkuptojnë edhe qëllimin apo misionin e vetë partisë”, ka theksuar ai.

Lista Serbe aktualisht ka 9 deputetë në Kuvendin e Kosovës. Për veprimet e saj dhe mosdistancimin nga sulmi terrorist, në Kuvendin e Kosovës nuk kanë treguar nëse do të nisin procedura brenda kompetencave të legjislativit.