Gjykata Kushtetuese e Kosovës ka konstatuar se zvarritja për më shumë se 18 vjet e një procedure civile në Gjykatën Themelore në Gjakovë ka shkelur të drejtën kushtetuese për gjykim brenda një afati të arsyeshëm kohor.
Në aktgjykimin për rastin me numër KI151/25, të parashtruar nga Fehmi Kameri, Kushtetuesja ka vlerësuar se kohëzgjatja e procedurës në lëndën [C.nr.3114/24] ishte e pajustifikueshme dhe në kundërshtim me nenin 31 të Kushtetutës dhe nenin 6 të Konventës Evropiane për të Drejtat e Njeriut.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoSipas Gjykatës Kushtetuese, çështja nuk ka qenë aq komplekse sa të justifikonte një proces kaq të gjatë.
“Gjykata konsideroi se në rrethanat e rastit konkret, kohëzgjatja e procedurës së zhvilluar në lidhje me lëndën [C. nr. 3114/24] në Gjykatën Themelore prej më shumë se tetëmbëdhjetë (18) vitesh është e paarsyeshme, për shkak se: (i) çështja e parashtruesit të kërkesës nuk rezulton të jetë e një natyre aq të ndërlikuar sa që do të mund të justifikonte që procedura gjyqësore për zgjidhjen e lëndës përkatëse të mos përfundojë as pas kaq shumë kohe; (ii) parashtruesi i kërkesës ishte relativisht aktiv në zgjidhjen e çështjes së tij; si dhe (iii) gjykatat e rregullta pavarësisht veprimeve procedurale që kishin ndërmarrë, e që karakterizohen edhe me shtyrjen e seancave, duke përfshirë edhe vendosjen e rastit më 16 dhjetor 2019 nga Gjykata Themelore dhe kthimin në rigjykim të çështjes nga ana e Gjykatës së Apelit më 26 gusht 2024, janë treguar të ngadalta dhe joefikase për të zgjidhur çështjen brenda një afati të arsyeshëm”, thuhet në aktgjykim.
Rrjedhimisht, Gjykata konstatoi se kohëzgjatja e procedurës për rastin e parashtruesit të kërkesës për më tepër se tetëmbëdhjetë (18) vite, ka shkelur të drejtën e tij për gjykim brenda një afati kohor të arsyeshëm, të garantuar me paragrafin 2 të nenit 31 [E Drejta për Gjykim të Drejtë dhe të Paanshëm] të Kushtetutës në lidhje me paragrafin 1 të nenit 6 (E drejta për një proces të rregullt) të Konventës Evropiane për të Drejtat e Njeriut.
Kushtetuesja ka theksuar se gjykatat e rregullta duhet të ndërmarrin të gjithë hapat e nevojshëm për ta përmbyllur lëndën civile [C. nr. 3114/24] me prioritet, dinamikë të shtuar dhe brenda një afati sa më të shpejtë kohor, konform gjetjeve të këtij Aktgjykimi.
Rrethanat e rastit konkret ndërlidhen me një kontest civil për vërtetimin e të drejtës së pronësisë mbi ngastra kadastrale, procedurë kjo e iniciuar fillimisht në vitin 1997 nga babai i parashtruesit të kërkesës, tani i ndjerë.
Pas disa zhvillimeve procedurale dhe kthimit të çështjes në rigjykim nga Gjykata e Apelit, procesi ende nuk ka marrë epilog përfundimtar.