-
Nga:
Jehona Gjinovci
- 29 qershor 2022 19:09
- Shpërndaje në:
Komuna e Prishtinës ka ndarë tri lokacione për ndërtimin e tri çerdheve të reja publike.
Kolovica e Re, Kolovica e Vjetër dhe Mati 1 janë lagjet që do bëhen me kopshte publike, pasi caktimi i lokacioneve u votua nga asamblistët që ishin prezent gjatë mbledhjes së pestë të Kuvendit Komunal të Prishtinës, të mërkurën.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoDrejtoresha e Arsimit, Besianë Musmurati, tha se është duke u punuar në vazhdimësi edhe për gjetjen e lokacioneve tjera në mënyrë që të bëhen kopshte në ato lagje ku ka mungesë të tyre.
Përderisa asamblistë të pozitës kanë përgëzuar drejtoreshën Musmurati, partia më e madhe opozitare Vetëvendosja, insiston se meritë për këtë është qeverisja e nivelit qendror.
Gjatë mbledhjes, por edhe përmes një statusi në Facebook, asamblisti Gëzim Sveçla ka deklaruar se është Ministria e Arsimit që ka kërkuar nga Komuna e Prishtinës ndarjen e lokacioneve, në mënyrë që vetë ministria, IPA dhe BIK-u të mund të financojnë ndërtimin e këtyre çerdheve.
“Prishtina me tri çerdhe të reja - nga ndryshimi i ndodhur në nivelin qendror po përfiton edhe niveli lokal, gjithandej vendit. Qeveria e Republikës së Kosovës, konkretisht Ministria e Arsimit, ka kërkuar dy lokacione nga Komuna e Prishtinës për ndërtimin e dy çerdheve. Njëra me financim nga Ministria e Arsimit dhe tjetra me fonde IPA. Po ashtu, BIK-u ka kërkuar një lokacion për financimin e ndërtimit të një çerdheje tjetër. Kuvendi Komunal i Prishtinës, me vota unanime të asamblistëve, votoi për ndarjen e tri lokacioneve për ndërtimin e këtyre Institucioneve Parashkollore. Kolovica e Re, Kolovica e Vjetër dhe Mati 1 janë lagjet përfituese”, ka thënë Sveçla.