Mesfushori anglez i Real Madridit, Jude Bellingham, ka thënë se vendimi për përjashtimin e Eduardo Camavingas në humbjen 4:3 nga Bayern Munichu të mërkurën mbrëma në “Champions”, ishte shaka.
Zëvendësuesi Camavinga, i cili në fushë ishte për vetëm 24 minuta, e mori kartonin e dytë të verdhë në minutën e 86-të, pasi e goditi topin për ta vonuar goditjen e lirë të Bayernit, pas faullit në Harry Kanen.
Derisa Bellingham ishte duke kaluar afër gazetarëve për të hipur në autobus pas ndeshjes, ai u pyet nëse kjo ka ndikuar në rezultatin përfundimtar të ndeshjes kthyese të çerekfinales.
“Shaka”, ka thënë spanjolli duke e tundur kokën, derisa vazhdoi. “E pamundur që ai të jetë karton i kuq”.
Pas përjashtimit të Camavingas, Bayern Munichu shënoi dy gola dhe avancoi në gjysmëfinale me rezultatin e përgjithshëm 6:4.
Edhe trajneri Alvaro Arbeloa, ka thënë se kartoni i Camavingas e prishi lojën.
Edhe
Reali me një futbollist më pak në fushë
Ka pasur edhe shumë kritika tjera ndaj gjyqtarit kryesor të ndeshjes, sllovenit Slavko Vinçiq.
“Është më e mira që të mos flas për gjyqtarin. A e patë kartonin e kuq? Nuk mund ta përjashtoni një futbollist për një gjë të tillë. Askush nuk e kupton se si një lojtar përjashtohet për atë. Mendoj se ai e nxori kartonin e verdhë sepse nuk e dinte që Camavinga është i ndëshkuar. Ishin lojtarët e Bayernit që i treguan se për të ishte kartoni i dytë i verdhë. Është gabim i dyfishtë dhe e prishi lojën”, u ka thënë ai gazetarëve.
Në pamjet televizive, edhe kapiteni Dani Carvajal, i ka thënë gjyqtarit slloven se për eliminim, fajtor është ai.
