Një argjentinas, por jo Lionel Messi, ishte më i miri tek Inter Miami në ndeshjen hapëse të Kupës së Botës për Klube. Portieri Oscar Ustari u shpall më i miri i ndeshjes së luajtur në orët e para të mëngjesit të dielën, sipas kohës në Kosovë.
Kupa e Botës për Klube filloi në SHBA.
Ustari bëri tetë pritje, duke përfshirë një penallti, ndërsa Inter Miami luajti pa gola me Al Ahlyn e Egjiptit, në ndeshjen e Grupit A të zhvilluar në Miami.
38-vjeçari Ustari është kthyer në ngjarje globale, në formatin e zgjeruar të Kupës së Botës për Klube, për herë të parë që kur e fitoi Botërorin U20 në vitin 2005. Në skuadër edhe atëherë ishte me kapitenin e Inter Miamit, Messi.
Paraqitje impresive kishte edhe portieri i ekipit nga Egjipti, Mohamed El Shenawy.
