(E përditësuar 20:35) - Skuadra e Juventusit e ka fituar thellë ndeshjen e parë të edicionit të ri të Ligës së Kampionëve. Ekipi italian mposhti të martën mbrëma PSV Eindhovenin me rezultatin 3:1.
Ndeshja e parë e fazës së ligës në mes të Juventusit dhe PSV-së u zhvillua në stadiumin “Allianz Stadium” të Torinos. Pra, Juventusi fitoi tre pikët e parë të edicionit 2024/2025 të Championsit.
Kenan Yildiz shënoi golin e parë në minutën e 21-të, kurse gjashtë minuta më vonë Weston McKennie realizoi për 2:0. Juventusi shënoi edhe një gol në pjesën e dytë, saktësisht në minutën e 52-të. Golin për 3:0 e shënoi Nicolas Gonzalez, derisa golin e nderit për holandezët e shënoi Ismael Saibari në minutën e 93-të.
Juventusi e luan më 2 tetor ndeshjen e dytë në udhëtim ndaj Leipzigut, kurse PSV-ja e pret Sporting Lisbonën më 1 tetor.
Juventusi në epërsi prej dy golave në pjesën e parë
(E përditësuar 19:32) - Skuadra e Juventusit e ka mbyllur pjesën e parë në epërsi prej dy golave ndaj PSV Eindhovenit në ndeshjen e xhiros së parë të fazës së ligës në Ligën e Kampionëve.
Golat për Juventusin në pjesën e parë i shënuan Kenan Yildiz në minutën e 21-të dhe Weston McKennie në minutën e 27-të.
Në ndeshjen tjetër, Aston Villa po fiton 2:0 në udhëtim tek Young Boysi. Youri Tielemans në minutën e 27-të, dhe Jacob Ramsey në minutën e 38-të i realizuan golat për klubin anglez.
Nis edicioni i Ligës së Kampionëve me sistem të ri
(18:47) - Nga ora 18:45 ka nisur edicioni i ri i Ligës së Kampionëve 2024/25. Ky edicion është i veçantë pasi do të ketë sistem të ri të ndeshjeve në forme lige.
Ndeshjet Juventus – PSB dhe Young Boys – Aston Villa janë të parat që kanë nisur këtë edicion.
Nga ora 21:00 është super përballja mes Milanit dhe Liverpoolit. Bayerni pret Dinamo Zagrebin e Arbër Hoxhës, ndërsa Reali është vendas i Stuttgartit. Lille i Edon Zhegrovës do të luajë ndaj Sportingut në Portugali.
Me sistemin e ri janë 36 skuadra pjesëmarrëse. Secila do të zhvillojë tetë ndeshje me kundërshtarë të ndryshëm – katër si vendas, katër si mysafir. Pas tetë ndeshjeve, tetë vendet e para kualifikohen në 1/8 e finales, ndërsa nga vendi i 9 deri te i 24-ti luajnë mes vete në fazën 1/16 e finales me dy ndeshje vajtje – ardhje (si në sistemin e vjetër) për të siguruar biletën për fazën tjetër.
