Federatat nordike kanë humbur besimin tek Infantino

Gjashtë federata nacionale të futbollit të vendeve nordike kanë shtuar presionin ndaj presidentit të FIFA-s, Gianni Infantino. Këto federata kanë thënë se kanë humbur besimin te lidershipi i Infantinos.
Federatat e futbollit nga Suedia, Norvegjia, Finlanda, Danimarka, Islanda dhe Ishujt Faroe lëshuan deklaratë të përbashkët të dielën për të thënë se e “shohin qeverisjen dhe vendimmarrjen e organizatës me shqetësim të madh”.

Federatat e gjashtë vendeve kanë thënë se qëndrojnë të bashkuara me Konfederatën Evropiane të Futbollit (UEFA) dhe mbështesin masat që UEFA i ka propozuar tashmë.

“Ne presim që FIFA të ofrojë garanci detyruese që qeverisja ose garat e organizatës nuk do të hapen më kurrë për pronësi private”, shkruan në deklaratë.

Infantino përballet me presion për të dhënë dorëheqje pasi planet e tij për të shitur aksione tek investitorët privatë shkaktuan reagime dhe kritika nga UEFA, Konfederata Aziatike dhe CONCACAF-i, që drejton futbollin në Amerikën e Veriut, Amerikën Qendrore dhe Karaibet.

“Ne gjithashtu mbështesim thirrjen e Konfederatës Aziatike, CONCACAF-it dhe UEFA-s për një hetim të jashtëm plotësisht të pavarur mbi ngjarjet që lidhen me propozimin e FIFA-s për shitje të aksioneve”, thonë federatat nordike në deklaratën e përbashkët.

Deklarata i bëri thirrje FIFA-s të “fillojë një shqyrtim gjithëpërfshirës dhe të pavarur të kornizës së saj të qeverisjes”, për të parë nëse ajo po i përmbahet “pavarësisë, kontrolleve dhe balanceve, si dhe transparencës dhe llogaridhënies që ishin menduar kur FIFA miratoi programin e saj të reformës në vitin 2016”.