Rekordmeni për triumfe në Kupën e Afrikës, Egjipti, përballet me Afrikën e Jugut të premten, në betejën e parë të titanëve në edicionin 2025 të shfaqjes kryesore të Konfederatës Afrikane të Futbollit.
Përgatitjet e Egjiptit për Kupën e Afrikës mbetën në hije të përplasjes që ylli i kësaj përfaqësuese, Mohamed Salah, kishte me Liverpoolin. Megjithatë Egjipti mbetet prej favoritëve për triumf në ngjarjen që po mbahet në Marok.
Afrika e Jugut ishte forcë e re në kontinent në fund të viteve 1990 dhe në fillim të viteve 2000, por ka mbetur në harresë në vitet e fundit. Pritjet megjithatë mbesin të mëdha dhe një fitore eventuale ndaj Egjiptit do të rriste entuziazmin në Afrikën e Jugut.
Ndeshja Egjipti – Afrika e Jugut zhvillohet të premten nga ora 16:00 në Agadir.
Te Egjipti kanë thënë se Salah është plotësisht i fokusuar për ta ndihmuar përfaqësuesen që të triumfojë në Kupën e Afrikës. Salah ishte dy herë nënkampion i Kupës së Afrikës, në vitin 2017 dhe 2021, por nuk ka titull ndërkombëtar në karrierën e tij shumë të suksesshme.
Në ndeshjen e xhiros së parë ai e shënoi në minutën e 91-të golin e fitores 2:1 ndaj Zimbabvesë. Me rezultatin 2:1 fitoi edhe Afrika e Jugut ndaj Angolës. Ishte hera e parë në 21 vjetët e fundit që jug-afrikanët e hapën me fitore kampionatin kontinental.
Grupi B është vlerësuar grup i vdekjes, duke parë edhe rritjen e Angolës dhe ringjalljen e Zimbabvesë. Dy të parët e të gjitha gjashtë grupeve avancojnë në fazën nokaut, bashkë me katër përfaqësueset më të mira të gjashtë grupeve sa janë në total.
Edhe
Afrika e Jugut i bashkohet Egjiptit në fazën e dytë
Egjipti synon fitore për të siguruar avancimin në fazën nokaut që në ndeshjen e dytë.
Egjiptianët e kanë fituar plot shtatë herë Kupën e Afrikës, të njohur si AFCON. Por suksesin e fundit e kishin në vitin 2010. Duket pak befasi që me Salahun në përbërje, Egjipti nuk ka triumfuar në kampionatin kontinental.
Në vitin 2017, Egjipti humbi 2:1 në finale nga Kameruni. Në vitin 2021, Egjipti e humbi me penallti finalen nga Senegali. Edicioni i kaluar i Kupës së Afrikës ishte në vitin 2023. Bregu i Fildishtë e fitoi 2:1 finalen ndaj Nigerisë.
