Real Madridi nuk ka realizuar dy prej tri synimeve të mëdha. U ndal në çerekfinale të Ligës së Kampionëve dhe po ashtu e humbi finalen e Kupës së Mbretit. Është prapa edhe në garën për titull në La Liga, por megjithatë është ende në lojë.
Pesë xhiro para fundit, Madridi është i dyti me 72 pikë. 76 pikë në vendin e parë i ka Barcelona.
Për fundjavë, përkatësisht për xhiron e 34-t, te Real Madridi jo vetëm që presin në fitore, por shpresojnë edhe në gabim të Barcelonës. Më pas në xhiron e 35-të është klasikja Barcelona – Real Madrid, që zhvillohet më 11 maj nga ora 16:15.
Barcelona të shtunën prej orës 21:00 luan në udhëtim ndaj Real Valladolidit. Dështimi i Barçës për të fituar do të ishte befasi shumë e madhe. Valladolidi është i fundit me vetëm 16 pikë dhe pa gjasa për mbetje në elitë.
Reali të dielën nga ora 14:00 e pret Celta Vigon. Kjo skuadër i ka 46 pikë në vendin e shtatë.
Reali së fundi është goditur nga lëndimet e shumta. Të lënduar janë Antonio Rudiger, David Alaba, Ferland Mendy, Eduardo Camavinga, Eder Militao dhe Dani Carvajal.
Barça ka 14 ndeshje pa humbje në ligë. Skuadra e Hansi Flickut është në rrugë të mirë për ta fituar tripletën. Por ka orar shumë të ngjeshur.
Barçës për ndeshjen ndaj Valladolidit do t’i kthehet mbrojtësi i krahut, Alejandro Balde. Por do të ketë mungesa të rëndësishme si ajo e Robert Lewandowskit dhe Jules Koundes.
Barcelona pritet të kursejë energji për ndeshjen e kthimit gjysmëfinale të Championsit me Interin, që luhet të martën në “Giuseppe Meaza”. Ndeshja e parë përfundoi 3:3.
