Carlo Ancelotti udhëtoi dje për në Londër për të firmosur kontratën me federatën braziliane për ta udhëhequr përfaqësuesen e Brazilit. Ai nuk e bëri këtë, por menaxheri që ndërmjetësoi ka pritur që trajneri i Real Madridit të firmosë sot.
Por Carlo Ancelotti e ka informuar që nuk do ta pranojë ofertën, shkruan Marca të mërkurën.
Ancelotti e ka kontaktuar personalisht presidentin e federatës braziliane, Ednaldo Rodrigues, për të shprehur mirënjohjen për interesimin e brazilianëve.
Tekniku italian po e shqyrton një ofertë të majme nga Arabia Saudite, shkruan gazeta e madhe spanjolle, e afërt me Real Madridin.
Oferta nga Arabia Saudite është raportuar të jetë prej 50 milionë euro neto në edicion.
Nga Brazili ka pasur raportime që Ancelotti ka kërkuar nga Madridi katër milionë euro si kompenzim për shkëputje të mëhershme të kontratës. Por Madridi e ka refuzuar këtë. Te Real Madridi presin që Ancelotti të largohet dhe që të heq dorë nga viti i fundit i kontratës, pa pranuar ndonjë kompenzim.
