Me shfaqjen e tij të fundit në Kalanë e Versajës, Simon Porte Jacquemus është bashkuar me ligat e mëdha. Kendall Jenner dhe Gigi Hadid dolën në pistë të hënën përballë 150 të ftuarve që mbërritën për të parë shfaqjen nga anije të vogla me çadra.
Pjesë e mysafirëve ishin Victoria Beckham, Eva Longoria, Monica Bellucci e të tjerë.
Vendi është i pasur me historinë e modës dhe Jacquemus tani është pjesë e saj. Defilimi i modës “Battle of Versaille” në vitin 1973 shënoi një pikë kthese për industrinë dhe megabrendet Dior dhe Chanel kanë organizuar defilime të tyre të mahnitshme atje në të kaluarën. Për Jacquemus, një markë 14-vjeçare nuk ishte e lehtë të arrinte në Versajë.
Jacquemus, i cili është i njohur për vendosmërinë e tij, arriti të bindte vendin pas muajsh bisedimesh. Ai e pa marrëveshjen e ardhshme si një mënyrë për të fituar një audiencë të re për markën e tij.
"Marka ime është e lidhur me rininë, mendoj se kjo është arsyeja pse Versaja vendosi të më ketë dhe të ndërtojë një marrëdhënie me brendin” tha ai për “Vogue”.
Jacquemus po rritet dhe shfaqja në Versajë vjen në një kohë kur marka po arrin në shumë destinacione.
Sipas markës, shitjet kaluan 200 milionë euro vitin e kaluar, në krahasim me rreth 100 milionë euro në vitin 2021, dhe tani punëson 250 persona. Brendi synon që në vitin 2025 të arrijë shifrat deri në 500 milionë euro.
“Jacquemus” tashmë është bërë një megabrend.
Në shfaqjen e së hënës u prezantua një çantë e re quajtur "Le Calino", përmes së cilës ata synojnë një klientelë të re.
Shfaqja e së hënës u quajt "Le Chouchou" duke u frymëzuar nga disa pamje të Princeshës Diana dhe Marie Antoinette.
Koleksioni përfshinte mëngë dramatike dhe kapuça në stil fijesh, dhe tre fustane dasmash mbyllën shfaqjen në ngjyrën blu, të bardhë dhe të kuqe, ngjyra e flamurit francez.
© KOHA. Të gjitha të drejtat janë të rezervuara.
