Vështirësive të jetës, Betim Bregovina kishte vendosur t’u dilte përballë duke qenë frymëzim për të tjerët, nëpërmjet realizimit të ëndrrave të tij.
Shkrimtarin e ri nuk e kishte ndalur as dëmtimi i të pamurit, për të përçuar mesazhin e tij nëpërmjet poezisë.
“Diku në moshën 16 vjeçare kam shkruar poezitë e para, më saktësisht nëse nuk gaboj...që është edhe poezia e parë në librin e parë”, thotë ai.
Mirëpo, problemi me sytë, nuk e ndali që të jepte mesazhin që e mendonte. I memorizoi poezitë e tij dhe ia diktoi herë motrës e herë një edukatori të tij.
“Nga një varg ia kam diktuar, varg për varg ai e ka shkruar, ekziston fletorja fatkeqsisht lapsi jo. Fletorja e poezive të para ekziston”, shton Bregovina.
Kështu kishte lindur përmbledhja e parë me poezi, “Mall i murosur” për të qenë pararendëse e 6 veprave të tjera.
“Fillimisht për mua kanë qenë preokupimet të ndikuara prej folklorizmit, që është libri i parë. Iliria, Dardanët...”, shprehet ai.
Por, frymëzimet e të riut me 3 diploma në Universitetin e Prishtinës dhe një tjetër në ardhje nuk u mjaftuan me kaq.
“Kam shkruar për dëshira, simpati, dashuriçka e shoqeve të klasës të shkollës, porosi shok pas shoku”.
Lidhja e tij me lexuesit është e veçantë. Betimi kishte trokitur në dyert e shkollave të Klinës, Vushtrrisë e Prishtinës për të mbetur në mendjet e nxënësve si simbol i përpjekjes.
Në anën tjetër, përgatitja akademike dhe njohuritë e tij në shumë fusha nuk ia mundësuan atë që e priste, punësimin.
“Nëse më pyet a të kanë ofruar punësim, unë e kam një përgjigje krejt të kundërt me ata tënden. Më kanë ofruar diskriminim”, thotë Bregovina.
Betimi përtej botimeve autoriale, ka marrë pjesë edhe në botime grupore në revistat “Fuqia e Fjalës” dhe “Kufijtë e pritjes”, e cila është punë dhe mund i komunitetit të të verbërve të Kosovës, teksa ata kanë sjellur 4 versione të botimit, duke përfshirë atë akustik, alfabetin latin në format të librit dhe në dimensione më të mëdha si dhe formatin e shkrimit braill.
Krejt në fund, ai ka një mesazh për të rinjtë.
“Ndiqeni ëndrrën e juaj dhe përmbushuni, por rrini thjeshtë, sepse e keni obligim të bëni opozitën e të vërtetës”, deklaroi Bregovina.
