Autoritetet ruse raportuan të shtunën sulme të shumta ndaj sistemeve të votimit dhe linjave të komunikimit në mbarë vendin, gjatë zgjedhjeve parlamentare që po zhvillohen nga 18 deri më 20 shtator.
Sipas mediave shtetërore, sistemi i votimit online në Moskë u godit nga një sulm i fuqishëm gjatë natës, por situata mbetet nën kontroll, tha kreu i Komisionit Qendror të Zgjedhjeve Ella Pamfilova, shkruan Reuters.
Sulmet po vazhdonin, por të gjitha po zmbrapseshin me sukses, shtoi ajo.
Ministria ruse e Zhvillimit Digjital njoftoi se kishte regjistruar një përpjekje për sabotim të linjave të komunikimit, por se sulmi ishte parandaluar dhe komunikimi ishte rikthyer plotësisht.
Rusët filluan të votonin të premten në zgjedhjet parlamentare treditore.
Presidenti Vladimir Putin më herët e kishte akuzuar Ukrainën se po përpiqej të ndërhynte në procesin zgjedhor, pa ofruar prova.
Rezultati i zgjedhjeve pritet që të përdoret nga Kremlini si dëshmi e mbështetjes së gjerë publike për politikat e Putinit dhe, veçanërisht, për mënyrën se si ai po e zhvillon konfliktin më vdekjeprurës në Evropë që nga Lufta e Dytë Botërore.
Shumica e kandidatëve kundër luftës janë përjashtuar nga pjesëmarrja.