Përzgjedhësi i përfaqësueses së Holandës, Frank de Boer ka thënë se vendimtar në humbjen e ekipit të tij ishte momenti i kartonit të kuq i marrë nga mbrojtësi i Juventusit, Matthijs de Ligt. Ai ka theksuar se Holanda humbi disa raste shënimi, të cilat më pas i kushtuan. Holanda u eliminua nga Çekia në një të tetën e finales të Evropianit. U mposht të dielën nga çekët me shifrat, 2:0.
“Ata ishin kundërshtarë të vështirë, por unë mendova se ishim më të mirë deri në kartonin e kuq. Ne e dominuam lojën. Denzel Dumfries arriti në rast dy herë në pjesën e parë dhe kështu bëri edhe Patrick van Aanholt. Por, në secilin rast, topi përfundimtar mund të ketë qenë më i mirë. Ndeshje si kjo sillen rreth një ose dy momenteve. Kishim njërin prej tyre me Donyell Malen dhe disa sekonda më vonë ishim me dhjetë futbollistë. Dhe, gjëja më e keqe që mund të bësh kundër një ekipi si ky është të mbetesh prapa. Atëherë ata mund të luajnë lojën saktësisht ashtu si dëshirojnë”, ka thënë De Boer pas ndeshjes.