5 perditesime
22:51

Danimarkës i mjaftoi një fitore për të avancuar në fazën nokaut

Fitorja bindëse ndaj Rusisë i ka mjaftuar Danimarkës për të avancuar në raundin nokaut të Evropianit të futbollit.

Të hënën mbrëma në Kopenhagë, në një atmosferë të zjarrtë në stadium, Danimarka ka fituar 4:1 ndaj Rusisë.

Damsgaard, Poulsen, Christensen dhe Maehle shënuan për Danimarkën, ndërsa Dzyuba shënoi nga penalltia për Rusinë.

Danimarka kishte humbur ndeshjen e parë nga Finlanda. Ai takim kishte mbetur në hije të kolapsimit të Christian Eriksenit.

Në ndeshjen e dytë Danimarka humbi nga Belgjika. Por me fitore ndaj rusëve, Danimarka renditet e dyta në grup me 3 pikë.

Në 1/8 e finales, Danimarka takohet me Uellsin.

22:40

Danezët shënojnë edhe golin e katërt

Danimarka po udhëheqë 4:1 ndaj Rusisë në ndeshjen në Kopenhagë.

Joakim Maehle shënoi pas një kundërsulmi në minutën e 82-të.

22:30

Rusia ngushton rezultatin, Belgjikës i anulohet goli

Rusia është kthyer në lojë në ndeshjen ndaj Danimarkës.

Artem Dzyuba ka realizuar penallti në minutën e 70-të për të ngushtuar epërsinë e danezëve në 2:1.

Ndërkohë në ndeshjen tjetër të Grupit B, Belgjikës i është anuluar goli i Romelu Lukakut për pozitë jashtë loje.

Rezultati mbetet 0:0. Me këto rezultate tutje avancojnë Belgjika e Finlanda.

22:24

Danimarka dyfishon epërsinë

Një gabim i rëndë i mbrojtësit Roman Zobnin i ka kushtuar rëndë Rusisë.

Zobnin ktheu një top në zonë, ku gjendej sulmuesi Yussu Poulsen që shënoi për epërsinë 2:0 të Danimarkës.

Danimarka ishte në epërsi prej minutës së 38-të, kur shënoi Mikkel Damsgaard.

Në ndeshjen tjetër mes Finlandës e Belgjikës nuk janë shënuar ende gola.

21:50

Danimarka në epërsi pas pjesës së parë

Danimarka po udhëheq 1:0 ndaj Rusisë pas pjesës së parë të ndeshjen në Kopenhagë. Damgaard ka shënuar gol të bukur për epërsinë e danezëve.

Nëse rezultatet nuk ndryshojnë deri në fund, atëherë Danimarka do të mbetet e treta në grup me tri pikë dhe duhet të pres ndeshjet tjera për të mësuar nëse kualifikohet.

Në ndeshjen tjetër të grupit B, Finlanda e Belgjika nuk kanë shënuar në pjesën e parë.

21:41

Damsgaard kalon Danimarkën në epërsi me supergol

Mikkel Damsgaard ka shënuar një gol të bukur për ta kaluar në avantazh Danimarkën në ndeshjen ndaj Rusisë.

Damsgaard shënoi golin në minutën e 38-të me goditje të bukur nga afro 20 metra.

Është një tjetër gol i bukur i shënuar në Euro 2020.