6 perditesime
22:52

Italia në një të tetën e finales, vazhdon me formë të lartë

Italia ka vazhduar me formë të lartë në Euro 2020 dhe tashmë ka siguruar kalimin në raundin nokaut. Pas fitores 3:0 ndaj Turqisë në ndeshjen hapëse, Italia të mërkurën mbrëma në Romë fitoi 3:0 edhe ndaj Zvicrës.

Me këtë fitore Italia kaloi në një të tetën e finales. Italia udhëheq në Grupin A me gjashtë pikë dhe bëhet përfaqësuesja e parë që avancon prej fazës grupore. Italia ka dominuar ndaj Zvicrës dhe ka shënuar fitore pa u rrezikuar seriozisht. Manuel Locatelli ka shënuar dy golat e parë për italianët. Në minutën e 89-të Ciro Immobile vendosi rezultatin përfundimtar, 3:0. Ishte kjo ndeshja e dhjetë e Italisë pa gol të pranuar. Ka fituar të gjitha këto ndeshje. Te Zvicra u paraqiten Granit Xhaka e Xherdan Shaqiri, por pa mundur të shmangin humbjen.

22:49

Immobile shënon golin e tretë për italianët

Ciro Immobile e ka shënuar golin e tretë për Italinë në ndeshjen që po e fiton ndaj Zvicrës.

Immobile shënoi në minutën e 89-të të ndeshjes që po luhet në kuadër të Grupit A. Me fitoren ndaj Zvicrës, Italia është bërë përfaqësuesja e parë që siguron fazën e nokautit.

 

22:12

Locatelli shënon edhe golin e dytë

Mesfushori Manuel Locatelli e ka shënuar edhe golin e dytë në ndeshjen ndaj Zvicrës. Locatelli e shënoi golin e dytë në minutën e 52-të, ndërsa Italia është duke fituar 2:0, në ndeshjen që i takon Grupit A.

Me fitore, Italia e siguron kalimin në 1/8 e finales së Evropianit.

 

21:48

Dominim i plotë i Italisë në pjesën e parë

Italia ka shkuar në pushim mes pjesëlojëve me epërsi 1:0. Italia po fiton ndaj Zvicrës, në ndeshjen e raundit të dytë të fazës grupore në Euro 2020. Italia e Zvicra po luajnë në Romë. Italia kishte fituar 3:0 ndaj Turqisë në ndeshjen hapëse, ndërsa po dominon plotësisht edhe ndaj helvetikëve.

Locatelli shënoi golin e epërsisë, ndërsa Italisë iu anulua një gol për lojë me dorë. Italia ka pasur shtatë tentime për gol, ndërsa Zvicra vetëm një.

21:28

Italia në epërsi ndaj Zvicrës

Ndonëse iu anulua një gol, Italia ka kaluar në epërsi ndaj Zvicrës.

Italiani po e dominon ndeshjen me helvetikët, ndërsa Manuel Locatelli shënoi në minutn e 26-të për 1:0. Ai shënoi nga afërsia pas asistimit të Domenico Berardit. Italia po shfaqet fuqishëm edhe në ndeshjen e dytë në Euro 2020.

 

21:24

Italisë i anulohet goli 

Kapiteni i Italisë, Giorgio Chiellini shënoi gol për Italinë në minutën e 19-të, por i është anuluar pas shikimit të VAR-it.

Chiellini në duel me Granit Xhakën ndali topin me dorë e më pas shënoi.

Por, goli u vlerësua i pavlefshëm. Ndeshja Itali – Zvicër mbetet 0:0.

20:08

Xhaka e Shaqiri sërish titullarë te Zvicra, Mehmedi në stol

Kapiteni Granit Xhaka dhe Xherdan Shaqiri sërish janë titullarë te Zvicra që e zhvillon ndeshjen e dytë kundër Italisë prej orës 21:00.

Kjo ndeshje i takon Grupit A, ndërsa Zvicra në ndeshjen e parë kundër Uellsit barazoi 1:1.

Italia e ka mposhtur Turqinë 3:0.

Admir Mehmedi është sërish në stol te Zvicra.

Image