5 perditesime
19:28

Erikseni në gjendje stabile

Futbollisti danez, Christian Eriksen, është në gjendje stabile shëndetësore pas kolapsimit që pësoi në fund të pjesës së parë në ndeshjen ndaj Finlandës.

Lajmi është bërë i ditur nga UEFA që po ashtu ka thënë se lojtari është dërguar në spital.

Detajet tjera do të jepen më vonë, ka njoftuar UEFA.

Ndërkohë, Federata Daneze ka bërë të ditur se Erikseni është zgjuar dhe po i nënshtrohet ekzaminimeve në spital.

UEFA do të takohet me të dyja ekipet në orën 19:45 për të marrë vendim se çka do të ndodhë me ndeshjen. 

19:23

Publikohet fotografia shpresëdhënëse për Eriksenin

Një fotografi që jep shpresë për gjendjen shëndetësore të futbollistit danez Christian Eriksen, ka nisur të qarkullojë në rrjete sociale.

Mesfushori kolapsoi në fund të pjesës së parë në ndeshjen Danimarkë-Finlandë dhe për më shumë se 10 minuta ekipi mjekësor ia ofroi ndihmën e parë në fushë, ndërsa bashkëlojtarët e tifozët u panë në lot.

Gjatë bartjes nga fusha nga ekipi mjekësor, Eriksen është fotografuar nga afër. Aty ai shihet me sytë hapur dhe teksa mban ballin.

Fotografia ka nxitur reagime të shumta me tifozët e futbollit që po luten për yllin e Interit.

19:21

Tifozët vazhdojnë të qëndrojnë në stadium në pritje të lajmeve për Eriksenin

Përkundër se ndeshja ndërmjet Danimarkës dhe Finlandës është ndërprerë tifozët të shumtë janë duke qëndruar në stadiumin “Parken Stadium”.

Sipas mediave angleze, tifozët janë në shok dhe nuk janë larguar ende.

Me lot në sy dhe lutje tifozë të shumtë janë duke pritur lajme mbi gjendjen shëndetësore të Eriksenit. Christian Eriksen ra pa ndjenja në fushë në minutën e 43-të.

Stafi mjekësor e ka larguar futbollistin nga stadiumi dhe është duke u trajtuar në një nga spitalet në Copenhagen.

19:03

UEFA e konfirmon: Pezullohet ndeshja Danimarkë – Finlandë

UEFA e ka konfirmuar që ndeshja mes Danimarkës dhe Finlandës është pezulluar, pas rënies në tokë pa ndjenja të Christian Eriksen.

“Ne nuk dimë asgjë më shumë përveç se ndeshja është pezulluar për shkak të një urgjence mjekësore për Christian Eriksen”, thuhet në njoftimin e UEFA-s.

18:55

Ndërpritet ndeshja për shkak të urgjencës mjekësore të Eriksenit

Ndeshja Danimarkë – Finlandë është ndërprerë. Kjo pasi mesfushori Christian Eriksen ra pa ndjenja në fushë në minutën e 43-të.

Zyrtarët e UEFA-s dhe të të dyja shteteve kanë biseduar mes vete, për mundësinë e përfundimit të ndeshjes.

Stafi mjekësor e ka larguar futbollistin e Interit nga fusha. Ai ishte i mbuluar nga të katër anët. Lojtarët dhe stafet zyrtare të Danimarkës dhe Finlandës janë jashtë fushës së gjelbër. Ende nuk ka vendim zyrtar se a do të vazhdojë ndeshja apo jo.

 

18:47

Eriksen bie pa ndjenja në fushë

Një episod mjaft i rëndë është regjistruar në ndeshjen Danimarkë – Finlandë.

Në minutat e fundit të pjesës së parë, mesfushori Christian Eriksen është shtrirë në fushë pa ndjenja. 

Ekipet mjekësore janë tash e 10 minuta në fushë për t'ia shpëtuar jetën futbollistit të Interit. 

Gjendja duket më serioze sesa që pritej në fillim. Futbollistët dhe tifozët janë të shokuar, teksa në stadium ka mbizotëruar heshtja.