Zvicra refuzon kërkesat për rieksportin e armëve në Ukrainë

Qeveria zvicerane ka njoftuar se nuk do të ndryshojë politikën e saj të kahershme të ndalimit të eksportit të armëve zvicerane në një vend të tretë, pavarësisht rritjes së presionit nga vendet evropiane për t'i eksportuar ato në Ukrainë, shkruan CNN.

Thirrjet që Zvicra t'i japë fund traditës shekullore të neutralitetit janë rritur si nga brenda ashtu edhe nga jashtë që nga fillimi i pushtimit rus të Ukrainës më shumë se një vit më parë. Dy komisione parlamentare rekomanduan lehtësimin e rregullave në janar.

Por qeveria refuzoi. “Këshilli Federal është i përkushtuar ndaj vlerave të neutralitetit zviceran dhe do të vazhdojë të punojë për të siguruar që përfitimet e neutralitetit të realizohen”, thuhet në deklaratë. Ata shtuan se do të vazhdojnë të ndjekin diskutimet dhe të flasin sërish “nëse është e nevojshme”.

Vendet që blejnë armë zvicerane duhet të kërkojnë leje për t'i rieksportuar ato armë. Që nga fillimi i luftës, Zvicra ka marrë kërkesa nga Gjermania, Danimarka dhe Spanja për të eksportuar pajisje ushtarake zvicerane në Ukrainë, por të gjitha këto kërkesa janë refuzuar.

Megjithatë, ajo miratoi sanksione të Bashkimit Evropian dhe bëri thirrje në mënyrë të përsëritur për tërheqjen e ushtarëve rusë nga Ukraina.