Presidenti i Ukrainës, Volodymyr Zelensky, ka thënë se ushtarët rusë që dorëzohen në Ukrainë do të trajtohen në “mënyrë të civilizuar”, raporton BBC.
Në adresimin e tij, Zelensky u ka bërë thirrje rusëve të ikin apo dorëzohen në momentin kur gjenden në fron në Ukrainë.
Thirrjet e tij vijnë pasi presidenti i Rusisë, Vladimir Putin, ka nënshkruar një dekret, sipas së cilit dënohen me dhjetë vjet burgim ushtarët rusë që i ikin shërbimit apo nuk përfillin urdhrat.
Në Rusi po vazhdojnë protestat kundër mobilizimit të pjesshëm të thirrur nga Putini, për të angazhuar 300 mijë trupa të rinj.
Organizate ruse e të drejtave të njeriut OVD-Info, ka raportuar se 700 persona janë arrestuar të shtunën, ndërsa mbi 1000 tjerë ishin arresëtuar më herët këtë javë. Arrestimet u bënë pas protestave të organizuara për të kundërshtuar mobilizimin.
Zelensky – duke folur në gjuhën ruse – u ka bërë thirrje rusëve të dorëzohen në Ukrainë e të mos rrezikojnë të dënohen si kriminelë lufte pas konfliktit.
Ukraina ka thënë se do të trajtojë dezertorët sipas konventave ndërkombëtare dhe nuk do të kthejë asnjërin në Rusi që i frikësohet përndjekjeve.
“Është më mirë të dorëzohesh sesa të vritesh nga armët tona”, ka thënë Zelensky.
