Zelensky shtron iftar për ushtarët myslimanë

Presidenti ukrainas, Volodymyr Zelensky, ka ngrënë iftar me ushtarët myslimanë ukrainas që agjëronin Ramazanin, të premten, në atë që ai tha se do të bëhej një "traditë e re respekti" e përvitshme.

Duke iu drejtuar pjesëmarrësve në darkën që përfshinte liderët e “Mejlisit”, organi më i lartë ekzekutiv-përfaqësues i tatarëve të Krimesë, dhe përfaqësuesit e klerit mysliman, Zelensky falënderoi komunitetin mysliman.

Ai ka thënë se muaji i Ramazanit “respektohet gjithandej Ukrainës – madje edhe në vijën e frontit, edhe në kushtet e luftës”.

Zelensky shfrytëzoi momentin të kritikonte sërish trajtimin që rusët ua bëjnë myslimanëve në Krime.

“Përpjekja e Rusisë për ta nënshtruar Ukrainën dhe popujt e tjerë të Evropës filloi pikërisht nga okupimi i Krimesë së Ukrainës, pikërisht nga shtypja në Krime kundër ukrainasve dhe tatarëve, kundër myslimanëve të Krimesë”, tha ai.