Ukraina do të gjykojë për tradhti kryetarin e qytetit që e dorëzoi te rusët

Të dielën, qyteti i vogël në lindje të Ukrainës, Kupyansk, ra në duart e ushtrisë ruse pa rezistencë. Në fund të ditës, doli kryetari i kësaj komune, Genadij Macegora, që tha se vendimi ishte i tij që qyteti të kontrollohej nga rusët dhe të mos kishte luftë.

Ai foli edhe për “kthim të normalitetit në qytet” që nga sot. Por, sot mori një mesazh tjetër nga institucionet qendrore në Kiev.

Ai është kërcënuar se do të gjykohet për tradhti dhe për ndërhyrje në integritetin territorial të Ukrainës.

“Krimet kundër themeleve të shtetndërtimit nuk kanë afat dhe herët a vonë armiqtë e Ukrainës do të ndëshkohen. Po dokumentojmë çdo tradhtar, do të mbajnë përgjegjësi sipas ligjit”, thuhet në faqen zyrtare në Facebook, të Shërbimit të Sigurisë së Ukrainës.