Presidenti Donald Trump ka njoftuar se Shtetet e Bashkuara do t’i ndërpresin marrëdhëniet tregtare me Spanjën.
“Do ta ndërpresim gjithë tregtinë me Spanjën. Nuk duam të kemi asgjë me Spanjën”, u tha ai gazetarëve të martën, teksa ndodhej në Zyrën Ovale gjatë një takimi me kancelarin gjerman Friedrich Merz.
Trump shtoi se i ka kërkuar sekretarit të Thesarit, Scott Bessent, të ndërpresë “të gjitha bizneset” me vendin evropian dhe anëtarin e NATO-s.
“Spanja ishte e tmerrshme”, ka thënë ai, duke iu referuar reagimit të vendeve të NATO-s ndaj sulmit amerikan me raketa ndaj Iranit.
Presidenti amerikan u shpreh se nëse duan t’i përdorin bazat në Spanjë për sulm ndaj Iranit nuk do të mund t’i ndalte askush. Por shtoi se nuk kanë nevojë për to.
“Spanja në thelb tha se nuk mund t’i përdornim bazat e tyre. Ata ishin armiqësorë. Spanja nuk ka absolutisht asgjë që na duhet, përveç njerëzve të mrekullueshëm. Kanë njerëz të mrekullueshëm, por nuk kanë udhëheqje të mirë. Spanja na tha se nuk mund t'i përdorim bazat e tyre. Në rregull, nuk kemi nevojë për to. Megjithatë, nëse duam, mund të zbarkojmë atje dhe t'i përdorim. Askush nuk do të na thotë se nuk mund t'i përdorim”, deklaroi Trump.
Spanja ka mohuar se i ka dhënë SHBA-së qasje në bazat e saj ajrore për “çfarëdo që nuk mbulohet nga marrëveshja ose që nuk është në përputhje me Kartën e OKB-së”, sipas transmetuesit shtetëror spanjoll RTVE.
Edhe
Trumpi kërcënon Italinë e Spanjën me tërheqje të trupave amerikane
Të paktën 15 aeroplanë amerikanë janë larguar nga bazat ushtarake Rota dhe Moron në jug të Spanjës që nga nisja e sulmeve të SHBA-së dhe Izraelit ndaj Iranit gjatë fundjavës, sipas të dhënave dhe hartave nga faqja për gjurmimin e fluturimeve FlightRadar24.
Ministri i Jashtëm i Spanjës, Jose Manuel Albares, deklaroi se Spanja nuk do të lejojë që bazat e saj ushtarake të përdoren për sulme ndaj Iranit.
Bazat menaxhohen bashkërisht nga SHBA-ja dhe Spanja, por janë nën sovranitetin spanjoll.
Izraeli bombardon Bejrutin e Teheranin, nis ofensivë tokësore në Liban
Izraeli ka nisur një valë të re të bombardimeve në Teheran dhe Bejrut, në ditën e...-
Spanja mbyll hapësirën ajrore për avionët amerikanë të përfshirë në sulmet ndaj Iranit
-
Spanja i thotë “jo luftës”, bën thirrje të mos përsëritet gabimi me Irakun
-
Spanja i përgjigjet Trumpit pas kërcënimit për ndërprerje të tregtisë
-
Trump pas refuzimit të Spanjës për objektivin e NATO-s: Do ta detyrojë të paguajë dyfishin