Ish-zyrtari Edin Vranj është arrestuar nga policia në Serbi të dielën mbrëma në pikëkalimin kufitar midis Serbisë dhe Bosnjë-Hercegovinës bazuar në akuzën se gjatë viteve 1993-1994 ka kryer krime lufte ndaj të burgosurve të luftës në Gorazhde
Ministria e Jashtme në Bosnjë-Hercegovinë ka tërhequr të hënën për konsultime ambasadoren e vendit në Serbi, Aida Smajiq, lidhur me arrestimin një ditë më parë të ish-zyrtarit të lartë të Shërbimit Federal të Policisë, Edin Vranj, nga policia në Serbi nën akuzën për kryerjen e krimeve të luftës.
Vranj ishte arrestuar të dielën mbrëma në pikëkalimin kufitar midis Serbisë dhe Bosnjë-Hercegovinës bazuar në akuzën se gjatë viteve 1993-1994 ka kryer krime lufte ndaj të burgosurve të luftës në Gorazhde.
Ndërkaq Ambasada e Bosnjës në Beograd është njoftuar zyrtarisht për kapjen e tij gjatë së hënës.
“Ambasada ka kërkuar menjëherë nga organet kompetente që përfaqësuesi i Ambasadës së Bosnjë-Hercegovinës ta vizitojë shtetasin boshnjak dhe të ofrojë ndihmë dhe mbrojtje ligjore”, është bërë e ditur në njoftim.
Ministrja e Jashtme e BH-së, Bisera Turkoviq, ka udhëzuar të dielën Ambasadën e BH-së në Serbi që “të reagojë menjëherë dhe që nga autoritetet në Serbi të marrë informata zyrtare dhe të plota lidhur me statusin e Edin Vranjit”.
Kapja e tij ka rindezur menjëherë tensionet mes dy vendeve, afro tri dekada që pas luftës së viteve 1992-1995 në Bosnjë-Hercegovinë.
Kabineti i kryesuesit të presidencës së Bosnjës, Zhelko Komshiq, ka njoftuar më herët se ambasadori i Serbisë në vend, Aleksandar Gjorgjeviq, ka refuzuar thirrjen për takim në presidencë për diskutimin e çështjes.
Kabineti i Komshiqit ka njoftuar se kjo është hera e parë gjatë 26 vjetëve të fundit që ambasadori i ndonjë vendi në Bosnjë ka refuzuar pjesëmarrjen në një takim në Presidencën e vendit.
Ambasadori serb megjithatë ka mohuar pretendimin, duke e cilësuar atë si dashakeq dhe të destinuar për gjenerimin e pakënaqësive karshi Ambasadës së Serbisë në Sarajevë.
“E respektoj vendin nikoqir. Por kujtoj se mënyra e njoftimeve në qarqet diplomatike është skajshmërisht precize, andaj dhe njihet mirë dhe zbatohet në mënyrë profesionale”, ka theksuar Gjorgjeviq, duke folur për edicionin në gjuhën serbe të Radio Evropa e Lirë. Ndërkaq Ministria e Jashtme në Beograd nuk u është përgjigjur pyetjeve të REL-it lidhur me rastin.
Kryesuesi i Presidencës së BH-së, Komshiq, dhe anëtari i Presidencës, Shefik Xhaferoviq, e vlerësuan të hënën arrestimin e Vranjit si “një prej përndjekjeve të shumta e të kalkuluara ndaj qytetarëve të BH-së, të ushtruara prej autoriteteve serbe në keqpërdorim të parimit të kompetencës universale për procesimin e krimeve të luftës”.
Ministrja Turkoviq ka njoftuar në llogarinë e saj në Twitter se shkaku i rastit Ministria e Jashtme i ka adresuar notë proteste Ministrisë së Jashtme në Serbi.
Kjo ministri ka ngarkuar Edin Vranjin se gjatë periudhës prej janarit të 1993-s deri në tetor të 1994-s, si zyrtar në kampin e Gorazhdes, ka marrë pjesë në maltretimin dhe rrahjen e të burgosurve serbë të luftës, të cilët ishin pjesëtarë të Ushtrisë së Republikës Serbe.
Duke folur më herët për REL, vetë Vranj ka deklaruar se është arrestuar në pikëkalimin kufitar Uvac, ndërsa ka shtuar se nuk e di arsyen e arrestimit.
“Jam privuar nga liria për shkak të disa dyshimeve, disa hetimeve në rrafshin e krimeve të luftës, disa dyshimeve për krime të luftës”, ka theksuar ai.
