Anëtarët e Presidencës së Bosnje dhe Hercegovinës janë takuar këtë të martë me presidentin e Serbisë, Aleksandar Vuçiq, dhe presidenten kroate, Kolinda Grabar-Kitaroviq.
Pas këtij takimi që u mbajt në Mostar, Vuçiq tha se fakti që “tani kemi paqe” është çështja më e rëndësishme. Presidenti serb ka thënë se bisedat në mes këtyre shteteve “nuk janë asnjëherë të ëmbla dhe të thjeshta”, transmeton kp.
“Sot ne kemi stabilitet dhe po i forcojmë lidhjet ekonomike dhe tregtare”, tha Vuçiq në një konferencë për shtyp me anëtarët e presidencës së Bosnjës, Dragan Çoviq, Mladen Ivaniq dhe Bakir Izetbegoviq. Ndër tjerash Vuçiq tha se qëllimi kryesor i këtij samiti të vogël është Strategjia e Zgjerimit e BE-së për shtetet e Ballkanit Perëndimor.
Aty u vë në pah edhe rritja e shkëmbimeve tregtare në mes të Kroacisë dhe Bosnjës, krahasuar me vitin 2016, duke shtuar se importi dhe eksporti kanë shënuar rritje serioze, e cila u pa si gjë e mirë për ekonomitë e të dy vendeve, raporton B92.
