Policia spanjolle ka arrestuar një nga të dyshuarit më të kërkuar në Evropë për pastrim parash.
Lajmi është bërë i ditur për mediat ndërkombëtare nga Europol, por pa konfirmuar identitetin e tij.
I kërkuari me shtetësi të dyfishtë irlandez-britanik u arrestua të hënën në qytetin jugor të Malaga-s pas një operacioni disa mujor.
Ai akuzohet për pastrimin e më shumë se 200 milionë eurove në para të paligjshme për organizatat kriminale në mbarë botën. Paratë dyshohet se janë transferuar duke përdorur sistemin bankar nëntokësor hawala, i cili nuk regjistron asnjë transaksion monetar fizik.
Zyrtarët filluan hetimet në fillim të vitit 2021 pasi autoritetet spanjolle kapën 200 kilogramë kokainë dhe 500,000 euro para të thata, të cilat u gjetën të fshehura në ndarjet sekrete të një numri automjetesh.
Dy persona të tjerë u arrestuan gjithashtu në Spanjë dhe një në Mbretërinë e Bashkuar, ndërsa 11 prona u kontrolluan, tha Europol në një deklaratë.
Një burim i afërt me hetimin i tha AFP-së se i dyshuari kryesor ishte 62-vjeçari, John Francis Morrissey, por Europol nuk e ka konfirmuar identitetin e tij.
Agjencia deklaroi se i arrestuari ka lidhje me kartelin ndërkombëtar të bosit të dyshuar irlandez të krimit të organizuar Daniel Kinahan, i cili është sanksionuar nga SHBA-ja.
“Në prill të këtij viti, ky person dhe kompania e tij u përcaktuan nga Departamenti Amerikan i Thesarit se ofronin mbështetje për klanin Kinahan”, tha Europol.
