Shqetësime për urinë në Korenë e Veriut, parashihen vdekje

Shqetësimet për mungesat kronike të ushqimit të Koresë së Veriut po rriten, me burime të shumta që thonë këtë javë se vdekjet për shkak të urisë janë të mundshme.

Disa ekspertë thonë se vendi ka arritur pikën e tij më të keqe që nga një zi buke e viteve 1990 e njohur si "Marshi i mundimshëm" i cili shkaktoi urinë masive dhe vrau qindra mijëra njerëz, ose rreth 3-5 për qind të asaj që ishte atëherë një popullsi prej 20 milionë banorësh.

Të dhënat e tregtisë, imazhet satelitore dhe vlerësimet nga Kombet e Bashkuara dhe autoritetet e Koresë së Jugut sugjerojnë se furnizimi me ushqim tani është "zhytur nën sasinë e nevojshme për të përmbushur nevojat minimale njerëzore", sipas Lucas Rengifo-Keller, një analist kërkimor në Institutin Peterson për Ekonomi Ndërkombëtare, raportoi CNN-in.

Edhe nëse ushqimi shpërndahet në mënyrë të barabartë – diçka afërsisht e paimagjinueshme në Korenë e Veriut ku elita dhe ushtria kanë përparësi, Rengifo-Keller ka thënë se “do të kishte vdekje të lidhura me urinë”.

Zyrtarët e Koresë së Jugut pajtohen me këtë vlerësim, me Seulin që njoftoi së fundmi se beson se vdekjet nga uria po ndodhin në disa zona të vendit. Megjithëse prodhimi i provave të forta për të mbështetur këto pretendime vështirësohet nga izolimi i vendit, pak ekspertë dyshojnë në vlerësimin e tij.

Edhe para pandemisë COVID, gati gjysma e popullsisë së Koresë së Veriut ishte e kequshqyer, sipas Organizatës së OKB-së për Ushqimin dhe Bujqësinë.