-
Nga:
Associated Press
- 11 janar 2022 21:56
- Shpërndaje në:
Rusia organizoi të martën manovra me zjarr të vërtetë me trupa dhe tanke pranë kufirit ukrainas, ndërkohë që kishte notë zhgënjyese mbi perspektivat për bisedime me Shtetet e Bashkuara që Uashingtoni shpreson se do të davarisin kërcënimin e mundshëm të pushtimi të Ukrainës.
Një ditë pasi pala amerikane i kërkoi Rusisë në Gjenevë që të tërhiqte rreth 100.000 trupa kufiri, Ministria e Mbrojtjes tha se rreth 3,000 ushtarakë kishin filluar stërvitjen luftarake, duke përfshirë beteja të rreme në katër rajone të Rusisë jugperëndimore.
Stërvitjet sugjeruan se Kremlini nuk ka ndërmend të lehtësojë presionin ushtarak që ka sjellë Shtetet e Bashkuara në tryezën e negociatave, ku Moska ka paraqitur kërkesa për garanci gjithëpërfshirëse të sigurisë nga Perëndimi.
Zëdhënësi i Kremlinit, Dmitry Peskov, tha se ishte optimiste që bisedimet e së hënës u mbajtën në mënyrë të hapur, thelbësore dhe të drejtpërdrejtë, porse nuk kishte arsye reale për optimizëm.
“Rusia dëshiron rezultate të shpejta”, tha ai. "Këtu nuk ka afate të qarta, askush nuk i vendos ato - ekziston vetëm qëndrimi rus se ne nuk do të jemi të kënaqur me zvarritjen e pafundme të këtij procesi”.
Peskov tha se situata do të ishte më e qartë pas dy rundeve të tjera të bisedimeve që Rusia do të zhvillojë këtë javë - me NATO-n në Bruksel të mërkurën dhe në Organizatën për Siguri dhe Bashkëpunim në Evropë (OSBE) në Vjenë të enjten.
Rusia ka thënë vazhdimisht se nuk ka ndërmend të sulmojë Ukrainën, porse ka të drejtë të vendosë forcat e saj siç e sheh të arsyeshme në territorin e saj.
Moska këmbëngul që Shtetet e Bashkuara dhe aleatët e saj të përjashtojnë mundësinë që Ukraina të mund të anëtarësohet ndonjëherë në NATO, e cila premtoi që në vitin 2008 të pranonte Kievin një ditë. Ajo gjithashtu dëshiron që NATO-ja të largojë forcat dhe armatimin nga vendet ish-komuniste që i janë bashkuar asaj që nga fundi i Luftës së Ftohtë.
Uashingtoni ka thënë se nuk mund t'i pranojë këto kërkesa, megjithëse është i gatshëm të angazhohet në aspekte të tjera të propozimeve të Rusisë, duke diskutuar vendosjet e raketave ose kufizimet në madhësinë e stërvitjeve ushtarake.