Rusia akuzohet se përdori spiun për t’ia vjedhur AstraZenecas formulën e vaksinës

Rusia është akuzuar për përdorimin e një spiuni në Britani të Madhe, me qëllim të vjedhjes së modelit për vaksinën anti-COVID të AstraZenecas. Kjo thuhet se u bë që “Vladimir Putin të krijojë vaksinën dhe të fitojë garën për të prodhuar ilaçin kundër koronavirusit”.

Burimet e mediumit britanik Dailymail thonë se kanë dëshmi që në Britaninë e Madhe ishte një plan sekret që tentoi ta vidhte formulën e vaksinës. Por, nuk u bë e qartë nëse kjo ndodhi brenda laboratorit të Oksfordit apo jashtë tij.

Ministri britanik i Punëve të Brendshme, Damian Hinds, ka deklaruar se nuk mund ta komentojë rastin, mirëpo as nuk e mohoi atë.

“Është e drejtë të supozohet se ka shtete të huaja që vazhdimisht tentonin të merrnin në dorë informacione të ndjeshme, përfshirë ato shtetërore, shkencore apo pronësi intelektuale”, deklaroi ai.

Bëhet e ditur se hakerët rusë kishin bërë përpjekje për sulme kibernetike në Universitetin e Oksfordit, që nga marsi i 2020-s, rreth një muaj kur shkencëtarët njoftuan se po përgatitnin zhvillimin e një vaksine.

Edhe Botë 7 mar 2021 Autoritetet amerikane thonë se agjencitë ruse kanë filluar fushatë kundër vaksinës së Pfizerit

Në prill të vitit të kaluar, Oksfordi dhe AstraZeneca njoftoi se kishin nisur provat e para në njerëz, mirëpo një muaj më pas, Moska zyrtare tha se e kishte shpikur vaksinën e tyre. Në gusht të po atij viti, presidenti rus, Vladimir Putin, “shpalli fitoren” se Rusia ka bërë zbulimin e vaksinës anti-COVID. Më vonë, doli që vaksina Sputnik V, funksiononte në të njëjtën mënyrë si AstraZeneca, dhe se të dyja përdornin virusin e njëjtë për ta bartur agjentin imunitetin që shkatërron koronavirusin.

“Unë mendoj se duhet të merremi seriozisht me spiunazhin rus dhe kinez. Pavarësisht nëse është vjedhja e modelit për AstraZenecan apo spiunimi ndaj burimeve tona”, ka thënë deputeti i konservatorëve, Bob Seely.