Ukraina ka akuzuar Rusinë se ka sulmuar me bomba me fosfor qytetin e rrethuar të Bakhmutit, raportoi të shtunën BBC-ja.
Në pamjet me dron të publikuara nga ushtria ukrainase, Bakhmuti mund të shihet në flakë ndërsa ajo që duket të jetë fosfor i bardhë bie mbi qytet.
Armët me fosfor të bardhë nuk janë të ndaluara, por përdorimi i tyre në zonat civile konsiderohet një krim lufte. Ato krijojnë zjarre me përhapje të shpejtë që janë shumë të vështira për t'u shuar. Moska është akuzuar për përdorimin e tyre edhe më parë.
Ministria e Mbrojtjes e Ukrainës nëpërmjet një postimi në Tëitter ka njoftuar se sulmi me fosfor kishte në shënjestër zonat e papushtuara të Bahkmutit.
Është e paqartë se kur ka ndodhur saktësisht sulmi i supozuar. Por pamjet e shpërndara nga Ukraina, treguan ndërtesa të larta të përfshira nga flakët.
Edhe
Ukraina akuzon Rusinë se përdori bomba fosfori në Azovstal
Rusia është akuzuar për përdorimin e fosforit të bardhë disa herë që kur nisi pushtimin e saj në shkallë të plotë të Ukrainës vitin e kaluar, përfshirë gjatë rrethimit të Mariupolit në fillim të luftës.
Moska nuk e ka pranuar kurrë publikisht përdorimin e fosforit të bardhë. Fosfori i bardhë është një substancë e ngjashme me dyllin, e cila ndizet në kontakt me oksigjenin, duke krijuar shtëllunga të ndritshme tymi.
Ai digjet në 800 gradë Celsius dhe mund të shkaktojë djegie ekstreme në mishin e njeriut. Është gjithashtu jashtëzakonisht ngjitës dhe i vështirë për t'u hequr, dhe mund të rindizet kur hiqen fashat.
