Nga viti 2000 deri në vitin 2022 ka pasur 16 sulme ose episode të dhunshme në shkolla në Brazil, katër prej të cilave në gjysmën e dytë të vitit të kaluar. Ka shkaqe të shumta që nxisin rritjen e sulmeve në shkolla në Brazil – nga pabarazia te mosarsimimi, mungesa e prindërve dhe ekspozimi ndaj dhunës – dhe disa nuk janë kombëtare, por më tepër rajonale apo edhe lokale
(AP) - Prindërit në këtë qytet të vogël në Brazilin jugor po luftojnë se si t'u shpjegojnë fëmijëve të tyre se një burrë theri katër nga miqtë e tyre, ndërsa brazilianët në të gjithë vendin po pyesin se çfarë duhet bërë për të frenuar rritjen në dukje të dhunës sistematike në shkolla.
Dhjetëra vajtues u mblodhën në qendrën e kujdesit ditor në Blumenau ndërsa mbrëmja ra të mërkurën, për t'u lutur, për të vendosur lule për viktimat - të moshës 5 deri në 7 vjeç - dhe për të qarë. Të paktën katër fëmijë të tjerë u lënduan në sulmin që tronditi kombin dhe bëri presion mbi Qeverinë për të gjetur zgjidhje.
Carlos Kroetz dhe prindër të tjerë mbërritën për të mbledhur çantat e shpinës të fëmijëve të tyre të lëna pas në qendër gjatë kaosit të mëngjesit të së mërkurës.
“Vajza ime mendon se një hajdut hyri dhe iku pa dëmtuar askënd”, tha Kroetz për Associated Press, ndërsa mbante çantën me Minnie Mouse të vajzës së tij 6-vjeçare. “Ajo njihte fëmijët që vdiqën. Ne ende duhet të gjejmë një mënyrë për t'ia thënë asaj. Tani për tani, ajo ka frikë të shkojë vetë në banjë, sepse mendon se hajduti do të jetë atje”.
Franciele Chequeto tha se një nga vajzat e vrara ishte shoqe me djalin e saj 7-vjeçar, Gabrielin.
Edhe
Katër fëmijë vriten në kopsht nga një person në Brazil
"Ai nuk po kuptonte", tha Chequeto. “U ula dhe i thashë se nuk do të mund të shihte më disa nga miqtë e tij të vegjël”.
Frekuenca e lartë e sulmeve në shkolla
Autoritetet nuk kanë dhënë ende ndonjë motiv për sulmin nga një burrë me kapelë, por ai ndodhi pasi sulmet në shkolla në Brazil kanë ndodhur me frekuencë gjithnjë e më të madhe viteve të fundit.
Brenda pak orësh Qeveria federale po përpiqej të formulonte një strategji për të luftuar problemin, pasi analistët e sigurisë shpresonin se vrasja, në një qytet me 366 mijë banorë në shtetin “Santa Catarina”, mund të provonte momentin vendimtar që jep veprime produktive - dhe të vonuara - në mbarë vendin.
Ministri i Drejtësisë, Flávio Dino, u takua me përfaqësues nga shoqatat studentore, më pas u tha gazetarëve në Brasilia se ai po ndante 150 milionë reai (30 milionë dollarë) nga fondi i sigurisë publike të vendit për të mbështetur sigurinë e shkollave. Ai tha se paratë do të shkojnë si për rritjen e pranisë së policisë, ashtu edhe për zgjerimin e një ekipi me bazë në Brasilia për monitorimin e komuniteteve të rrjetit të thellë, vende në internet ku gjuha e urrejtjes dhe dhuna mund të përkrahen.
Ndërkohë, ministri i Arsimit, Camilo Santana, njoftoi krijimin e një grupi për të trajtuar dhunën në shkollë. Santana do të drejtojë grupin, i cili është planifikuar të takohet për herë të parë të enjten.
“Nuk ka fjalë për të ngushëlluar familjet. Kushdo që ka humbur një të afërm e di se nuk ka fjalë”, tha të mërkurën presidenti, Luiz Inácio Lula da Silva, me sy të përlotur në fillim të një takimi ministror. Ai u kërkoi ministrave të tij të mbanin një minutë heshtje.
Edhe
Tre të vrarë e 8 të plagosur në një sulm me armë në shkollë në Filipine
Nga viti 2000 deri në vitin 2022, ka pasur 16 sulme ose episode të dhunshme në shkolla në Brazil, katër prej të cilave në gjysmën e dytë të vitit të kaluar, sipas një raporti nga studiues të udhëhequr nga Daniel Cara, një profesor edukimi në Universitetin e Sao Paulos. Të 12 hulumtuesit – përfshirë psikologë, shkencëtarë socialë, edukatorë të shkollave publike, gazetarë dhe aktivistë – ia dorëzuan raportin e tyre qeverisë në ardhje të Lulas në dhjetor.
Javën e kaluar një student në Sao Paulo goditi me thikë një mësues dhe plagosi disa të tjerë.
“Një krizë perspektive”
Nuk ka asnjë faktor të vetëm për të shpjeguar rritjen e sulmeve të tilla, por një emërues i përbashkët është ajo që Cara e quan "një krizë perspektive" në lidhje me problemet ekonomike dhe gjasat që çdo sulmues është përballur me situata zhgënjimi dhe dhune, duke përfshirë ngacmimin.
Shpesh vrasësit janë të rinj që përfshihen në fjalime mizogjene ose raciste, përdorin simbole neonaziste dhe fashiste dhe kanë qasje në komunitetet online ku dhuna përkrahet, tha ai për Associated Press.
Të rinjtë që vuajnë gjejnë strehë në këto komunitete online, sipas Cleo Garcia, një anëtare e grupit kërkimor GEPEM që heton bullizmin dhe dhunën në shkolla, dhe e cila është e lidhur me tri universitete të shquara. Mediat sociale, veçanërisht gjatë garës polarizuese presidenciale të vitit të kaluar midis Lulas dhe Jair Bolsonaros, gjeneruan një kakofoni kërcënimesh kundër grupeve të ndryshme.
Garcia shtoi se problemi duhet trajtuar si një problem i cenueshmërisë sociale, jo vetëm i sigurisë.
Edhe
Mbi 100 raste të dyshuara për dhunë e abuzim seksual në çerdhe e shkolla në Francë
“Këto ngjarje konsideroheshin të rralla, siç ishin ngjarjet ekstreme klimatike, por ngjarjet klimatike tashmë kanë protokollet e tyre për t'u monitoruar dhe trajtuar. Kjo është ajo që na duhet”, tha Garcia. "Në Shtetet e Bashkuara kjo tashmë konsiderohet një epidemi dhe ne shpresojmë që të mos arrijë deri këtu".
Përktheu: Forca Jashari
