-
Nga:
Associated Press
- 8 nëntor 2022 22:34
- Shpërndaje në:
Një grup për të drejtat e grave në Poloni u bëri thirrje njerëzve të demonstrojnë pasi kreu i partisë në pushtet pretendoi se niveli i ulët i lindjeve në Poloni është shkaktuar pjesërisht nga gratë e reja që pinë shumë alkool.
Politikanët e opozitës, aktivistët dhe personazhet e famshme akuzuan Jaroslaw Kaczynskin, beqar 73-vjeçar, se nuk ishte në dijeni se çfarë po ndodhte. Ata gjithashtu argumentojnë se Kaczynski, politikani më i fuqishëm në Poloni që nga viti 2015, është vetë pjesërisht përgjegjës për nivelin e ulët të lindjeve në vendin e Evropës Qendrore me 38 milionë banorë.
Në veçanti, kritikët vënë në dukje rritjen e kufizimeve për abortin që kanë dekurajuar disa gra që të mbeten shtatzënë. Të tjerë vënë në dukje vështirësinë që të rinjtë kanë në rritjen e familjeve në kushtet e inflacionit që po arrin afro 18%.
Një grup për të drejtat e grave shprehu zemërim ndaj komentit të Kaczynskit dhe u bëri thirrje njerëzve të protestojnë përpara shtëpisë së Kaczynskit në Varshavë, më 28 nëntor, në 104-vjetorin e fitimit të së drejtës së votës së grave në Poloni.
“Fjalët kretinore të një plaku se gratë nuk lindin fëmijë sepse pinë (dhe jo sepse Polonia është ferr), ky është vetëm një fragment i realitetit tonë”, shkroi Sindikata e Grave të hënën në Facebook.
Grupi tha se kishte shumë arsye për nivelin e ulët të lindjeve në vend, duke përfshirë ndalimin de facto të abortit nga Polonia, mungesën e aksesit në edukimin seksual dhe procedurat in vitro, inflacionin, mungesën e strehimit dhe mungesën e qasjes në qendrat e kujdesit ditor.
Kaczynski, kreu i partisë populiste në pushtet, Ligj dhe Drejtësi, foli të shtunën për sfidat demografike të lindjes së "shumë pak fëmijëve" teksa kërkoi mbështetjen për partinë e tij përpara zgjedhjeve parlamentare të vitit të ardhshëm.
“Dhe këtu ndonjëherë është e nevojshme të thuhen pak hapur disa gjëra të hidhura. Nëse, për shembull, situata mbetet e tillë që deri në moshën 25 vjeç, vajzat, gratë e reja të pinë të njëjtën sasi si bashkëmoshatarët e tyre, nuk do të ketë fëmijë”, tha Kaczynski.
Ai pretendoi, pa asnjë provë mjekësore, se për të zhvilluar alkoolizmin, burri mesatar "duhet të pijë tepër për 20 vjet", por "një grua vetëm dy".
“Unë jam vërtet një përkrahës i sinqertë i barazisë së grave, por nuk jam përkrahës i grave që pretendojnë se janë burra dhe burrave që pretendojnë se janë gra”, tha Kaczynski.
Vendi tradicionalisht katolik romak kishte tashmë një nga ligjet më kufizuese të Evropës për abortin, me aborte të lejuara në shumë pak raste, para vitit 2020. Më pas, një vendim i ri thoshte se gratë nuk mund të ndërpresin shtatzëninë për një kohë të gjatë në rastet kur fetusi ka anomali të rënda dhe nuk është i shëndetshëm pas lindjes.
Numri i lindjeve për grua në Poloni ka rënë nga 3 fëmijë për grua në vitin 1960 në 1.2 në 2003, sipas Bankës Botërore.
Filloi të rritet përsëri disi pas vitit 2003 dhe mori një nxitje pasi Qeveria e Kaczynskit prezantoi një përfitim mujor në para prej 500 zloti (108 dollarë) për fëmijë pasi fitoi pushtetin në vitin 2015, duke shpresuar të inkurajojë familjet më të mëdha.
Por shkalla e lindjeve është përsëri në rënie dhe Kaczynski pranoi muajin e kaluar se programi nuk po funksionon siç ishte menduar. Sipas statistikave të shtetit polak, shkalla e lindjeve ishte 1.32 fëmijë për grua në vitin 2021.
Përktheu: Forca Jashari